Филипче поднел измени на Програмата за имунизација: Вакцинацијата, во комбинација со мерките, може да ја смени сликата на пандемијата

Вакцините во земјава ќе стигнуваат согласно планот за дистрибуција кој ќе го одреди Ковакс, а испораката ќе биде истовремено во сите 127 земји

Измени на Програмата за задолжителна имунизација на населението во Северна Македонија за 2020 година, поднел денеска до Владата министерот за здравство Венко Филипче.

Програмата, како што информираат од МЗ, предвидува измени во делот за финансиски средства, како една од обрвските за влез во Ковакс -механизмот. Средствата се веќе обезбедени со последниот ребаланс на буџетот.

Преку Ковакс механизмот ќе се обезбедат 833.000 вакцини, за популација од околу 400.000 граѓани за вакцина и ревакцинација. Вакцините во земјава ќе стигнуваат согласно планот за дистрибуција кој ќе го одреди Ковакс, а испораката ќе биде истовремено во сите 127 земји, како и земјите од регионот Црна Гора, Албанија, Косово, Босна и Херцеговина и дел од Србија.

Капацитетите се подготвуваат за вакцинација против ковид: Вакцината ќе биде бесплатна за сите, препорачана е, но не и задолжителна

Првата испорака на вакцини се очекуваат во првите месеци од 2021 година.

„Покрај овој механизам, Министерството за здравство започна преговори, односно достави формални барања за обезбедување вакцини уште преку два други механизми. Првиот е во директни преговори и со директна набавка од компаниите ‘Фајзер’ и ‘Астра Зенека’ кои ги произведуваат вакцините, а од каде наскоро очекуваме да имаме и формална понуда. Третиот механизам е преку Европската Унија за што е исто така формално побарано од делегацијата во Скопје и очекуваме информација. ЕУ нарачува 200 милиони вакцини за земјите членки и уште дополнителни 100 милиони дози за земјите од Европа надвор од Унијата“,

истакнува Филипче.

Ковид вакцината ќе биде бесплатна за сите граѓани и нема да е задолжителна. Како што велат од МЗ, со почетокот на вакцинацијата нема веднаш да се намали ризикот од ковид 19, ниту пак веднаш ќе се почувствува намалување на притисокот врз здравствените установи. Но вакцинацијата и натаму доследното почитување на превентивни мерки можат значително да ја смената сликата на пандемијата. Вирусот ковид – 19, велат од МЗ, ќе продолжи да циркулира и следниот период, така што остануваат мерките за превентива и заштита. како носење маска, држење дистанца, негрупирање, хигиена на раце …

На приоритетната листа за вакцинација први ќе бидат здравствените работници кои работат со ковид, како и ризичните групи граѓани со зголемен ризик за ковид-19, за кои вакцината ќе биде високо препорачана, но не и задолжителна