На средбата се зборувало и за евроинтеграциите и уставните измени, но за жал, вели Филипче, тука имаат различни позиции
Добар и конструктивен – вака лидерот на Социјалдемократскиот сојуз на Македонија (СДСМ), Венко Филипче, го оцени денешниот состанок со премиерот Христијан Мицкоски што се одржа во зградата на Владата.
По средбата, Филипче рече дека и до премиерот е стигната пораката оти е потребна заедничка работа во области што се важни за подобрување на квалитетот на живеењето.
„Начелно договоривме дека ќе работиме на начинот да формираме заеднички тела или работни групи во делот пред сè на спроведување на реформската агенда. Значи првичните закони коишто треба да стигнат во Собранието во делот на правосудството, нешто што ги тангира сите, понатаму енергетиката и некои работи во однос на стратешките движења и проекти во здравството“,
вели Филипче.
Според Филипче, ова е првичен состанок и сè уште треба да се види и да се разработи таа методологија за која, како што рече, има добра волја од двете страни.
Прашан дали веќе договориле следна средба, Филипче одговори негативно додавајќи дека ова било меѓупартиска средба, а најави дека ќе бидат поканети и сите партии да се вклучат.
„Сега ќе номинирам неколку експерти од областа на правосудството и енергетиката за да се вклучат во изработката на законите што се дел од реформската агенда, а треба да стигнат во Собранието“,
рече тој.
Неговите очекувања се дека по ова сите политички партии ќе седнат на масата.
„Ова е за доброто на државата. Мора да се пушти порака за обединување за доброто на државата“, вели Филипче додавајќи дека немаме доволно човечки капацитет, а младите сè повеќе заминуваат од земјата.
На средбата се зборувало и за евроинтеграциите и уставните измени, но за жал, вели Филипче, тука имаат различни позиции.
„Ги разбирам позициите на премиерот. Останува за ова да разговараме дополнително“,
рече претседателот на СДСМ.
Филипче уште еднаш нагласи дека не станува збор за етнички состанок.
Смета дека средба со другите лидери треба да биде следно што треба да се случи по оваа средба.
„Граѓаните со ова треба да бидат свесни дека некој ги слуша нивните барања“,
рече Филипче оценувајќи ја оваа средба како позитивен сигнал и наведувајќи дека првпат се случува вакво нешто во земјата.
Одговарајќи на новинарско прашање во врска со случајот со модуларната болница, рече дека не чувствува одговорност и дека нема проблем случајот да биде повторно отворен.
Пред средбата со Филипче, Мицкоски на својот фејсбук-профил напиша дека одговорност, мудрост и чесност ѝ се повеќе од потребни на Македонија.