Лидерот на СДСМ ја обвини владејачката гарнитура дека за година и половина од преземањето на централната власт, не донела ништо освен ароганција, поделби, изневерени очекувања и игнорантски однос кон реалните потреби на граѓаните
АСНОМ не ја создаде оваа држава за некој да ја приватизира и да ја руши, да ги руши стратешките позиции и цели кои ги зацртавме и кои се во интерес на сите граѓани – порача лидерот на опозицискиот СДСМ, Венко Филипче, на вечерашниот митинг во Охрид. Од охриѓани побара мобилизација, единство и активна борба против, како што рече, неправдата, самоволието и деградацијата на институциите под актуелната власт на ВМРО-ДПМНЕ.
Во своето обраќање, лидерот на СДСМ ја обвини владејачката гарнитура дека за година и половина од преземањето на централната власт, не донела ништо освен ароганција, поделби, изневерени очекувања и игнорантски однос кон реалните потреби на граѓаните.
„Да дигнеме глас дека нема да молчиме пред неправдите, пред ароганцијата и пред игнорирањето на потребите на луѓето. Не смееме да оставиме самоволие на неколкумина да биде државна политика. Не можеме да дозволиме државата да стане алатка за лични интереси. ВМРО-ДПМНЕ докажа дека не знае да работи, дека немаат ниту капацитет ниту желба да им помогнат на луѓето да живеат подобро. Нема ни храброст и чувство за државност да решаваат проблеми. Но докажаа дека сакаат и знаат само да се одмаздуваат да владеат со терор и да шиканираат. Наша обврска е да ги спречиме. СДСМ е партија која може да го направи тоа“,
изјави Филипче во обраќањето пред охриѓани.
Првиот социјалдемократ го обвини премиерот и лидер на ВМРО-ДПМНЕ, Христијан Мицкоски, дека секој ден сè повеќе ја оддалечува државата од Европската Унија и покрај, како што рече, секојдневните изјави дека се прават поместувања во евроинтеграцискиот процес.
„Премиерот сам се пофали дека реформската агенда е ‘најдобриот документ што го подготвила оваа Влада’, дека е ‘инструмент за демократизација на општеството’, и ‘патоказ за да ја донесе Европа дома’, но со секој изминат ден државата ни е сè подалеку од Европа и од демократија со Мицкоски“,
изјави Филипче.
Додаде дека власта нема капацитет да изгради правна држава, туку нуди празни изјави без реални резултати.