„Гледам дека Мицкоски вели дека корумпираните политичари требало да се испратат во историјата. Пазете тој бил криминалофоб. Се плашел од криминалот. Да не беше смешно ќе беше трагично. Еве му шанса на Мицкоски да се послуша самиот себеси и нека се отстрани од политиката. И тој, и неговите соработници“, рече лидерот на СДСМ од партиската трибина во Кисела Вода
И лидерот на Социјалдемократскиот сојуз на Македонија (СДСМ, Венко Филипче денеска од партиската трибина во Кисела Вода во рамките на кампањата на локалните избори се осврна на вчерашната изјава на својот политички опоненет, премиерот и лидер на ВМРО-ДПМНЕ, Христијан Мицкоски дека е криминофоб.
Мицкоски вчера од Неготино рече дека не е албанофоб, како што го нарече кандидатот за градоначалник на Чаир од ДУИ, Бујар Османи, туку дека е криминалофоб, кој ги презира политичките криминалци што во политиката влегле како голтари, а излегле како милионери, богатејќи се на грбот на граѓаните.
Претходно денеска Османи ја коментираше изјавата на лидерот на ВМРО-ДПМНЕ, поставувајќи директно прашање до премиерот, што мисли за 150 дивоградби во Чаир или дека за плоштадот „Скендербег“ се земени провизии.
Лидерот на СДСМ, пак, од Кисела Вода го повика Мицкоски да преземе одговорност ако навистина е против корупцијата и криминалот во државата.
„Гледам дека Мицкоски вели дека корумпираните политичари требало да се испратат во историјата. Пазете тој бил криминалофоб. Се плашел од криминалот. Да не беше смешно ќе беше трагично. Еве му шанса на Мицкоски да се послуша самиот себеси и нека се отстрани од политиката. И тој, и неговите соработници“,
рече Филипче.
Во своето обраќање лидерот на СДСМ, рече дека токму партијата предводена од Мицкоски „има најголем број кривични пријави, а зградата на ВМРО-ДПМНЕ е изградена со народни пари“.
„Замислете, претседателот на ВМРО-ДПМНЕ, на најбогатата политичка партија во Европа, со седиште од 8 милиони евра изградено со пари на граѓаните од даноци, бил против криминалот. Мицкоски седи на столче во партијата кое од е купено со криминал, ама тој е против криминалот“,
рече Филипче.
Говорејќи пред насобраните членови и поддржувачи, тој обвини дека владејачката партија со народни пари ја платилата фирмата која е ангажирана за изборната кампања и дека нејзини претставници одат на митинзи со службени возила.
„Менито во владата веќе го знаете сите“,
рече Филипче.
Претседателот на СДСМ говореше и за економските политики на Владата, притоа наведувајќи дека за четири години локална власт и година и пол централна власт, ВМРО-ДПМНЕ немала ниту една своја инвестиција.
Тој додаде дека ВМРО-ДПМНЕ и Мицкоски се фалат со инвестициите на СДСМ и „отвораа патишта кои беа веќе завршени“.
„Прашањето е едноставно – може ли Мицкоски да наброи две целосно свои инвестиции? Единственото со што се пофалија беа проекти што СДСМ ги донесе до 98%, 99% реализација. Тие само ја сечеа лентата. Отвораа странски инвестиции по трет, четврти пат. Во Штип одеа по три пати во фабриките, ни кажуваат работниците се смееле. Отвораат улици и патишта што веќе беа завршени. Да не се проектите на СДСМ – Мицкоски нема ни каде да се слика“,
кажа Филипче.
На предизборниот собир во Кисела Вода беше присутна и кандидатката за градоначалничка на Скопје на СДСМ, Каја Шукова како кандидатот за градоначалник на оваа општина, Горан Трајковски.
Пред да говори за проектите што се дел од нејзината програма, Шукова се осврна ветувањата на актуелниот градоначалник на Кисела Вода, Орце Ѓорѓиевски , кој е нејзин противкандидат за прв човек на Градот Скопје. Во таа насока, таа кажа дека над 80 проценти од неговата програма за претходните локални избори во 2021 година останала само на хартија.
„Нема паркови, нема спортски сали, нема гасификација, нема населба за млади. Има само слики, загадување и крпени улици. А сега истиот човек сака да го води Скопје? Ние велиме не“,
рече Шукова.
Претставувајќи ја својата програма, таа најави 15 нови паркови за 15 месеци, инвестиции во модерен јавен превоз со еко-автобуси, сообраќајни решенија за метежот, како и системско решавање на депонијата „Дрисла“,
„’Дрисла’ не е туѓ проблем, тоа е рана на нашиот град. Ќе воведеме модерно управување, 24/7 надзор, и конечно ќе ставиме крај на чадот и дивите депонии. Ова е прашање на здравје, достоинство и правда за сите жители на Кисела Вода“,
кажа таа.
Шукова ги повика граѓаните да не останат неутрални на овие избори, бидејќи како што кажа, на нив ќе се одлучува „дали ќе се вратиме на празни ветувања и заборавени проекти, или ќе тргнеме напред со план, енергија и со работа“.