Филипче очекува конструктивна средба со Мицкоски, демантира дека состанокот има етничка димензија

Прашан за очекувањата од средбата, лидерот на СДСМ рече дека е внимателен оптимист

Навистина ми е драго што премиерот веднаш го прифати состанокот, очекувам конструктивна средба – изјави лидерот на СДСМ, Венко Филипче, непосредно пред средбата со премиерот и лидер на ВМРО-ДПМНЕ, Христијан Мицкоски, закажана за 14 часот во зградата на Владата.

Прашан за очекувањата од средбата, Филипче рече дека е внимателен оптимист.

„Темите ги нафрлив вчера, денеска на премиерот ќе се обидам подетално да му ги објаснам, како и некои предлог-начини така како што е моето размислување во моментов, без претензија дека тоа е вистинскиот начин, секако отворен сум за да разговараме за сите опции“,

изјави лидерот на СДСМ пред владината зграда.

Филипче ги демантираше обвинувањата на опозициската ДУИ оти денешната лидерска средба има моноетнички карактер. Состанокот, додаде тој, нема никаква етничка димензија.

• ДУИ: Како да се отстранат Албанците од сите нивоа на власт е една од точките на лидерската средба кои нема да ѝ се презентираат на јавноста

„Повикот за лидерска меѓупартиска средба беше и сè уште е за сите партии. Со оглед на тоа што премиерот прв и веднаш прифати, еве ќе поразговараме за темите кои сметам дека треба заеднички да се менаџираат, коишто никогаш на тој начин не биле така менаџирани. Мислам дека е навистина време да имаме поинаков пристап кон одредени важни прашања“,

додаде Филипче.

Лидерот на СДСМ се очекува да даде изјава и по средбата, додека од Владата најавија писмено соопштение.