Претседателот на опозициската партија ова го кажал во своето обраќање пред членовите на градската организација на СДСМ во Скопје, соопштија вечерва од партијата
Лидерот на опозицискиот Социјалдемократски сојуз на Македонија (СДСМ), Венко Филипче вели дека информациите што ги имаат говорат за драматичен пад на поддршката што нивниот политички опонент, владејачката ВМРО-ДПМНЕ ја има меѓу граѓаните.
Филипче, како што соооштија вечерва од СДСМ, денеска имал состанок членовите на градската организација на партијата во Скопје, на кој критикувајќи ги локалните и централните политики на владејачката партија, рекол дека ВМРО-ДПМНЕ досега изгубила 100 000 гласови од оние што ги имала на ланските парламентарни и претседателски избори.
„Нашите информации се дека ВМРО-ДПМНЕ има изгубено 100 илјади гласови досега. Таков пад на гласовите, таков дебакл досега во историјата на државата за толку кратко време едноставно не се случил“,
рекол Филипче, се наведува во партиското соопштение.
Во своето обраќање тој се осврнал и на економската состојба во државата и во таа насока рекол дека власта преку агресивна пропаганда се обидува да ја покрие реалната состојба.
„Не затрупуваат со информации, со пропаганда, со пи-ар дека прават економски бум. Што се случи? Бум слушнавме само со тоа што треснавме на земја. Евростат излегува со податоци дека сме последна земја во Европа според економската стапка“,
рекол лидерот на СДСМ.
Тој навел и дека ако институциите работата во интерес на граѓаните, тогаш премиер Христијан Мицкоски нема потреба да зборува за вредности, отчетност и транспарентност, реторика која, како што рекол, самиот ја демантира со секој чекор.
„Нема да има потреба да им зборуваат за фотелји, за клупи и за гајби на граѓаните ако навистина работат чесно. Факт е дека тоа не го прават на тој начин“,
рекол претседателот на СДСМ.
Во однос на состојбите на локално ниво, тој рекол дека „она што се случува во Скопје е најеклатантен пример на неспособноста, негрижата и корупцијата на власта“.
Како што кажал, пропаста на Скопје, е директна последица на пропаднатите зделки меѓу премиерот Мицкоски и актуелната градоначалничка Данела Арсовска, на блокадите од советниците на ВМРО-ДПМНЕ и на политичката калкулација на Владата која, како што рекол, и покрај тоа што има механизми, свесно го остава градот да се распаѓа.
„Скопјани не смеат да заборават дека Скопје тоне четири години заради пропаднатите бизнис зделки на Мицкоски со Арсовска. ВМРО-ДПМНЕ го држи Скопје во заложништво. Нивните функционери и советници од градот четири години немаат друга работа освен да попречуваат, блокираат и да се расправаат со Арсовска. Скопје е најдобар пример за тоа како владее ВМРО-ДПМНЕ, со прст не мрдаат ако од тоа немаат личен и политички интерес. За ова треба да бидат казнети на локалните избори“,
кажал Филипче.
Во таа насока го посочил и Трајко Славески, кој, според лидерот на СДСМ, како претседавач со Советот не придонел со ништо за Скопје, но сепак бил награден од ВМРО-ДПМНЕ со функцијата гувернер на Народната банка.
„Беше награден заради тоа што го уништи Скопје и не се ни потруди да направи нешто за градот“,
рекол Филипче.