Претседателот на државата како институција би требало да игра значајна улога во сите процеси на набавки, но конкретна поддршка од Пендаровски изостана, вели Филипче
Министерот за здравство, Венко Филипче, е изненаден од изјавата на шефот на државата, Стево Пендаровски, кој рече дека сликите со редици македонски граѓани кои чекаат вакцинирање во Србија се срам за нашата држава.
Пендаровски упати критики и рече дека таквите слики не смеарт да ни се повторат.
„Такви слики едноставно не може да се повторат. Благодарност до Србија, но тоа беше срам за нашата држава. Едноставно државата мора да пружи здравствена заштита тука. Точно е дека се потпиравме на Ковакс, кој задоцни 2 месеци, точно е дека верувавме во Солидарниот фонд на ЕУ, точно е дека од 5 најбогати членки на ЕУ ниту една нема вакцинирано ниту 5% од населението, точно е дека според СЗО околу 80 проценти од вакцините се распоредени во 10 земји во светот. Но тоа нашите граѓаните не ги интересира“,
рече Пендаровски по денешниот состанок на Советот за безбедност.
На ова реплицира министерот за здравство, Венко Филипче, и вели дека сликите од Србија не се срам, туку тоа е одраз на солидарност. Тој упати и критика до Пендаровски, дека како претседател на државата требало да има значајна улога во сите процеси на набавка на вакцините.
„Изненаден сум од изјавата на претседателот Пендаровски, сликите од Србија не се срам, тоа е одраз на солидарност во услови на криза. Покрај нашите граѓани се вакцинираа и граѓани на соседните земји, но ниеден претседател не рече дека е тоа срам за неговата земја. Владата прави максимални напори да обезбеди вакцини, а вакцинацијата започнува веќе од утре. Претседателот на државата како институција исто така би требало да игра значајна улога во сите овие процеси на набавки. За жал, конкретна поддршка од Пендаровски изостана“,
вели Филипче.