Ние ги слушаме сите ставови и на протестите, но досега не сме слушнале издржана контрааргументација за вакцинирањето, бидејќи тие протести се проследени со навреди и закани. Но, во исто време имаме зголемен број граѓани што се вакцинираат, дневно се вакцинираат по 12 до 13 илјади. И тоа е сериозен глас на граѓаните, вели Филипче
Лекарската комора ги следи објавите на социјалните мрежи и изјавите на медицинските лица кои го компромитираат процесот на имунизација против ковид и наскоро ќе излезат со став околу овие појави.
Ова го кажа министерот за здравство Венко Филипче одговарајќи на новинарско прашање околу дезинформациите што се шират на социјалните мрежи и од граѓаните, но и од медицински лица.
„Во однос на ширењето лажни вести во делот кога тоа го прават граѓани… Тие треба да знаат дека со лажните вести го загрозуваат јавното здравје и се доведува до сериозно оптоварување на болниците поради ширењето страв кај луѓето за да не се вакцинираат. Ние ги слушаме сите ставови и на протестите, но досега не сме слушнале издржана контрааргументација за вакцинирањето, бидејќи тие протести се проследени со навреди и закани. Но, во исто време имаме зголемен број граѓани што се вакцинираат, дневно се вакцинираат по 12 до 13 илјади. И тоа е сериозен глас на граѓаните. Во врска со медицинските лица што шират такви ставови, Лекарската комора сериозно ги анализира сите и наскоро ќе излезе со свој став“,
рече Филипче.
Владата започнува со кампања со цел граѓаните да се мотивираат за масовна вакцинација против ковид-19, но и да се спречат лажните вести што ги шират антиваксерските групи. Премиерот Зоран Заев, заедно со министерот за здравство Венко Филипче, денеска најави дека кампањата „Вакцинирај се, за моменти на среќа“ има за цел да го забрза процесот на имунизација и што повеќе граѓани да се охрабрат да се вакцинираат.
„Четвртиот бран на ковид-19 со новиот делта-сој, но и антиваксерските движења кои шират лажни вести и ги збунуваат граѓани, се причина за ваквата кампања. Само со комплетна вакцинација се спречуваат смртни случаи и тешка форма на болеста. Да ја прифатиме и да се отповикаме на повикот за масовна вакцинација, за децата да можат да тргнат на училиште, да се вратат артистите на сцените, да заживее економијата, да почнеме пак нормално да живееме. Кампањата има за цел да им го сврти вниманието на граѓаните да бидат внимателни кога до нив пристигнуваат вести што не се вистинити“,
рече Заев.