Поради корупција, како што рече лидерот на СДСМ, се случила и трагедијата во Нови Сад кога при уривање на натстрешницата на Железничката станица загинаа 16 лица
Корупцијата доведе до трагедијата во Кочани, вели лидерот на СДСМ, Венко Филипче, во интервју за неделникот „Фокус“ во пресрет на годишнината од трагедијата во која загинаа 63 лица.
Поради корупција, како што рече Филипче, се случила и трагедијата во Нови Сад кога при уривање на натстрешницата на Железничката станица загинаа 16 лица.
„Еднаш реков дека Србија има натстрешница, а Македонија – Кочани. Она што најмногу е заедничко е корупцијата! Корупцијата што ја водат ВМРО и СНС. Таа корупција доведе до паѓање на натстрешницата во Нови Сад, а изгледа дека истото доведе и до трагедијата во Кочани“,
рече Филипче.
Тој го обвини премиерот Христијан Мицкоски дека исто како српскиот претседател Александар Вучиќ, наместо одговорност и искрена помош, од трагедијата направил пи-ар.
„Ако се сеќавате, Вучиќ одеше во болница со голем број камери и ја сними посетата на повредените. Замислете повредени што се на стерилни одделенија, без право на посета за да не дојде до инфекција, а тој носи цела свита заради својата кампања. Веднаш потоа Мицкоски го направи истото. Дали се свесни дека можеле да им го загрозат животот на тие пациенти? До каде оди и што ризикуваат, само заради кампања?“,
вели Филиче во интервјуто за „Фокус“ и обвини дека Мицкоски го имитира Вучиќ во сè.