Имаме контакт со Германија и следната недела повторно ќе разговараме околу размената на искуствата меѓу двете земји во однос на борбата против ковид-19, рече министерот за здравство Венко Филипче во вечерашното гостување на Канал 5.
Тој не прецизираше за каква точно помош станува збор што ќе биде испратена од Германија во борбата против коронавирусот, но потврди дека комуникации во таа насока има. Филипче рече дека министерката за одбрана Радмила Шекеринска преку НАТО го остварила контактот за помош од Германија во земјава.
Тој зборуваше и за тоа дека во ниту една од епидемиолошките анкети не е утврдено дека некој кој почитувал мерки е заболен од коронавирусот.
„Секаде каде што анализиравме и направивме увид или не се носеле маски или имало голем собир, со огромен број луѓе на мала дистанца, или дистанцата не се почитувала во рамките на некои семејни настани. Ова е уште еден показател дека за да се заштитиме е почитувањето на овие протоколи. Проблемот потекна од 15 до 20 семејства во Скопје, и останати 20 во други делови од Тетово и Куманово. Од нив се тие жаришта од кои 65 до 70 проценти се во рамки на овие кластери, а 30 проценти се контакти надвор од кластерите“,
рече министерот Филипче.
Тој рече дека вториот бран од епидемијата не го очекувале толку рано, но според предвидувањата на епидемиолозите во доцната есен ќе има трет бран кој се очекува да биде уште посилен во однос на оптеретувања на здравствениот систем.
„Предвидувањата се темелат на тоа што тогаш ќе бидат во функција и градинките, училиштата, дополнително тогаш ќе биде и сеознскиот грип, којшто ги оптеретува истите болнички капацитети кои се користат за лекувањето на болните од ковид-19“, рече Филипче.