Филипче: Децата во Гевгелија имаат негативни тестови за ковид, допрва ќе се испитува за каква инфекција се работи

Министерот за здравство Венко Филипче денеска рече дека освен во Гевгелија нема пријавени вакви случаи во други градови

Тим од Детската клиника денеска оди во Гевгелија каде што заедно со тамошните лекари во Општата болница ќе испитува од каква респираторна инфекција заболеле 50-ина деца и бебиња во овој град.

Министерот за здравство Венко Филипче денеска само го повтори она што и вчера го најавија од Министерството, бидејќи сѐ уште нема детали ниту за каква инфекција се работи ниту индиции што би можело да ја предизвика.

Тој денеска само рече дека тестовите за ковид-19 кај децата биле негативни.

Исто така, рече и дека нема пријавени вакви случаи во други градови.

Министерството за здравство вчера објави дека вкупно 50 деца и бебиња од Гевгелија во изминатиов месец побарале лекарска помош во локалната општа болница, со симптоми на респираторната инфекција не се типични за овој период од годината – односно самите инфекции кои се појавиле сега во топлиот период, се карактеристични за есен и зима.

Респираторна инфекција кај 50 деца и бебиња од Гевгелија, лекарски тим од Скопје дополнително ќе ја испитува состојбата

Денеска тим од Клиниката за педијатрија, во состав д-р Аспазија Софијанова, д-р Весна Мицевска и д-р Валентина Јовановска Огненовиќ ќе бидат упатени во општата болница во Гевгелија, за поддршка на педијатрите и евентуални дополнителни испитувања во делот на специфична дијагностика.

Во моментов во болницата се хоспитализирани само две бебиња, поради возраста, а околу 20 деца се на терапија.