Целиот македонски народ има сон заеднички да влезе во Европската Унија, а ние како Европејци не може да го изневериме тој сон, истакна Роберто Фико, претседателот на италијанскиот Дом на пратеници при денешната посета на македонското Собрание, кој додаде дека тој процес веќе не смее да се одложува
Претседателот на Домот на пратениците на Италијанската Република, Роберто Фико, при денешната посета на македонското Собрание, истакна дека верува оти следниве месеци ќе бидат многу важни за можноста С Македонија да ги отвори пристапните преговори кон ЕУ и додаде оти тој процес веќе не смее да се одложува.
Тој рече дека знае оти целиот македонски народ има сон заеднички да влезе во Европската Унија, а ние како Европејци, додаде, не може да го изневериме тој сон.
Фико во своето обраќање истакна дека од гледна точка на Италија ќе направат сè што можат со сите европски партнери за да може да се дојде до започнување на преговорите за влез во Европската Унија.
„Денеска уште повеќе во контекст на ужасната војна што се случува во Украина, односно со нападот на Руската Федерација на Украина, целта Западниот Балкан да биде прв стратегиски партнер на ЕУ е од суштинско значење за Италија. Сметам дека во ЕУ никој не може ова да го негира, односно се надевам дека ќе биде препознаено како суштински приоритет“,
рече Фико на прес-конференцијата по средбата со неговиот домаќин, претседателот на македонското Собрание Талат Џафери.
Претседателот на Собранието Талат Џафери смета дека посетата на претседателот на Домот на пратениците на Италија се остварува во добар тајминг.
„Притоа, мислам на намалената доверба на нашите граѓани во брзото отворање на преговорите со Унија и полноправното членство во неа. Нагласив дека очекуваме во рамките на француското претседавање со Советот на ЕУ а особено од планираниот Самит посветен на Западен Балкан и проширување во јуни оваа година, да се испратат јасни и конкретни пораки до сите земји-членки и особено до нашиот источен сосед Република Бугарија, дека започнувањето на преговори на ЕУ со Република Северна Македонија и Република Албанија е повеќе од императив и секое натамошно одолговлекување ќе значи натамошно влошување на ситуацијата, што ќе се рефлектира како на економски, енергетски и безбедносен план, така и на политички“,
рече Џафери.
Џафери на средбата изразил благодарност до Домот на пратеници на Италијанската Република за искрената поддршка на нашите европски интеграции, со донесување на двете обврзувачки резолуции за италијанската влада.
Средбата на Џафери и Фико се остварува 23 години по последната одржана средба во Скопје, кога во посета беше поранешниот претседател на Домот на пратеници на Италијанската Република, Лучиано Виоланте.