Надворешните ризици се дополнително ублажени со репо-линијата којашто Европската централна банка ѝ ја одобри на Народната банка, констатира агенцијата за кредитен рејтинг во извештајот
Денарот останува стабилен, а фиксниот курс е клучно сидро на стабилноста на македонската економија, констатира агенцијата за кредитен рејтинг „Фич“ во извештајот во кој го потврди кредитниот рејтинг на земјава „ББ +“, со негативен изглед, објави Народната банка.
Во однос на девизните резерви се констатира дека достигнале 3,7 милијарди евра во септември и со оглед на добрата надворешна позиција, се очекува да бидат стабилни и во 2022 и 2023 година, одржувајќи соодветна покриеност.
Во извештајот се потенцира и сведувањето на основната каматна стапка на историски најниското ниво, при што „Фич“ очекува олабавена монетарна политика на Народната банка и во следниот период, во отсуство на зголемување на стапката на инфлација во текот на следната година и на натамошни притисоци врз домашниот девизен пазар.
Од „Фич“ оценуваат дека банкарскиот сектор ја задржа силната основа и покрај пандемичниот шок и постепеното укинување на мерките на финансискиот сектор за „олеснување“ на финансискиот товар на домаќинствата и претпријатијата. Притоа, се наведува дека банкарскиот систем е соодветно капитализиран и профитабилен.
Надворешните ризици, пак, се дополнително ублажени со репо-линијата којашто Европската централна банка ѝ ја одобри на Народната банка.
Раст
Агенцијата, предвидува раст на македонската економија од 4,1 отсто во 2021 година и 4,3 отсто во 2022 година, како резултат на поволните економски услови на клучните извозни пазари. Домашната кредитна достапност, континуираниот раст на платите и јавните инвестиции ќе ја поддржат домашната побарувачка, но закрепнувањето во целост ќе зависи од развојот на пандемијата и стапката на вакцинирано население, посочуваат од „Фич“.
Дефицит
Очекувањата на Агенцијата за буџетскиот дефицит за 2021 година се дека ќе изнесува 6,1 отсто од БДП, што е пониско од ревидираната владина проекција која изнесува 6,5 отсто од БДП. Како што е наведено во извештајот, Предлог-буџетот на Владата за 2022 година е во согласност со Фискалната стратегија 2022-2026 година, која предвидува опаѓање на буџетскиот дефицит на 4,3 отсто и 3,5 отсто од БДП во 2022 и 2023 година, респективно, пред да достигне 2,2 отсто од БДП до 2026 година.
Според „Фич“ усвојувањето на новиот Закон за буџети може да обезбеди силна поддршка за фискалната консолидација преку воведување на обновена фискална рамка, вклучувајќи фискални правила и формирање фискален совет.
Агенцијата очекува државниот долг да достигне 53 отсто од БДП до крајот на ова година и 55,3 отсто од БДП до 2023 година. Буџетскиот дефицит би се спуштил на 3 отсто од БДП до 2023 година, додека нето странските директни инвестиции се очекува да се позиционираат на 3,1 отсто од БДП до 2022 година, целосно финансирајќи го дефицитот на тековната сметка.
Кредитен рејтинг
Кредитниот рејтинг на една земја, како што велат од Министерството за финансии, пак, го покажува степенот на ризик од инвестирање во неа, и е еден од клучните индикатори коишто потенцијалните инвеститори ги земаат предвид при носење на нивните одлуки.
„Кредитниот рејтинг позитивно влијае врз одлуките за инвестирање во една земја, што понатаму има идно влијание врз зголемувањето на економскиот раст, зголемувањето на извозот, зголемена вработеност и повисоки плати. Потврдата на кредитниот рејтинг на државите во време на пандемија, исто така влијае, и врз намалување на трошоците за долгот на државата, со што се постигнуваат заштеди во каматните плаќања“,
велат од Министерството за финансии.