Од Федерацијата велат дека во соработка со надлежните институции ќе се обезбедат дополнителни механизми за превенција
Фудбалската федерација на Македонија (ФФМ) и Фудбалскиот клуб Брегалница најостро го осудија инцидентот што се случи денеска на натпревар од младинската Суперлига во Штип, меѓу екипите на Брегалница и Шкупи, кога дел од родителите на гостинските фудбалери влегоа на теренот и физички нападнаа неколку млади играчи на домашниот тим.
Од ФФМ информираа дека инцидентот е целосно неприфатлив и претставува грубо нарушување на спортскиот дух, ферплеј-принципите и безбедноста на младите спортисти. Според Федерацијата, ваквото насилство е апсолутно недозволиво, особено ако се има предвид дека жртви биле деца.
„Длабоко сме вознемирени од фактот што едно од децата претрпе сериозни повреди и скршеници како последица на нападот. Тоа е нешто што никогаш не смее да се дозволи да се повтори. ФФМ ќе преземе сите неопходни чекори – поведена ќе биде дисциплинска постапка против ФК Шкупи и одговорните лица, а сторителите на овој брутален чин ќе се соочат со соодветни санкции. Нашата порака е јасна – со насилство, на кое било ниво, нема компромис“, стои во реакцијата на ФФМ.
Од Федерацијата додаваат дека во соработка со надлежните институции ќе се обезбедат дополнителни механизми за превенција, со цел безбедноста на младите спортисти и нормално одвивање на натпреварите да бидат загарантирани.
Своја реакција испрати и ФК Брегалница, кој исто така најостро го осуди инцидентот и ги повика сите спортски чинители да дадат јасна поддршка во борбата против насилството на терените.
„Спортот треба и мора да биде колепка на почит, култура и демонстрација на здрави навики. За нас е апсолутно недозволиво родител или кој било друг да биде причина млади деца да завршат повредени на натпревар. Не смееме да дозволиме ваква слика да се повтори на кој било фудбалски и спортски терен. Теренот мора да биде место за натпреварување, за фер игра и за покажување на манири кои се учат од најмала возраст“, порачуваат од клубот.
Брегалница најави дека ќе бара максимални санкции за сторителите, но и институционална реакција која ќе спречи во иднина млади фудбалери наместо спортска радост да доживуваат трауми на теренот.
Претходно, од Министерството за внатрешни работи соопштија дека 43-годишен родител на фудбалер од скопскиот фудбалски тим Шкупи физички нападнал и повредил два малолетни фудбалери на Брегалница за време на одигурвање фудбалски натпревар помеѓу младинските екипи на двата тима одигран на игралиштето „Бело Брдо“ во Штип. Оттаму велат дека двајцата малолетници биле пренесени во Клиничката болница во Штип за укажување помош, а веднаш по нападот напаѓачот бил уапсен од полициски службеници од СВР Штип.