Сигурно ќе има многу повеќе случаи на инфекција, бидејќи омикрон е многу позаразен вирус од делта, вели главниот специјалист за инфективни болести на САД
Се уште постои опасност од зголемен број на хоспитализации поради високата заразност на омикрон, иако првичните податоци покажуваат дека оваа варијанта на коронавирусот е помалку опасна, предупреди главниот специјалист за инфективни болести на САД, Ентони Фаучи,
„Единствениот проблем е што ако имате толку многу случаи на инфекција, дури и ако стапката на хоспитализација е помала кај омикрон отколку кај делта, сепак, постои опасност да има голем пораст на хоспитализации, што може да го оптовари здравствениот систем“,
истакна Фаучи во интервју за Си-Ен-Ен.
Се проценува дека омикрон варијантата на коронавирусот е одговорна за 58,6 проценти од инфекциите со ковид-19 во САД според податоците од 25 декември, соопшти американскиот Центар за контрола и превенција на болести (ЦДЦ).
„Сигурно ќе има многу повеќе случаи на инфекција, бидејќи омикрон е многу позаразен вирус од делта“,
рече Фаучи.
Според него, се чини дека омикрон би можел да биде помалку опасен, имајќи ги предвид податоците од Јужна Африка, Велика Британија, па дури и некои прелиминарни податоци во САД.