Познатиот музичар од Сараево, со татко Хрват, мајка Србинка и жена Босанка – муслиманка, се претвори во ‘српски криминалец’, кој требаше да изгори во пожарите на албанскиот август, критикува премиерот на Албанија
Албанскиот премиер Еди Рама реагираше на обвинувањата против пејачот Горан Бреговиќ, кој настапи синоќа во Корча, наведувајќи дека бил пречекан како „криминалец“, иако не рекол ништо против Албанците и не пеел за масакрите на Милошевиќ.
Однеување на некои од присутните ги смета за фашистичка хистерија и срам за албанската историја и традиција, што, според него, воопшто не се разликува од хистеријата на линч на фашистичките групи насекаде во светот, пренесува МИА.
Рама посочува дека никој и никаде не дал ниту еден доказ за да ја оправда средновековната хистерија што избувна против еден од најизвонредните музичари на Балканот.
„Тоа беше фашистичка хистерија, срамна за европската култура на Албанците, исто така и за нашата историја и традиција, однесување кое за жал не се разликуваше воопшто од линч -хистеријата на фашистичките групи насекаде низ светот. Која е разликата, на пример, од оние кои во Србија ја навредуваат Дуа Липа со највалканиот речник на нејзините социјални мрежи, само затоа што таа е горда Албанка од Косово, која излегува завиткана во двете знамиња на нашите земји, со оние што на најниско ниво на нашите социјални мрежи пишуваат за Горан Бреговиќ, третирајќи го како воен злосторник и напразно обвинувајќи го само затоа што пее на српски“,
наведува Рама на објава на социјалните мрежи каде постира и видео запис од величенствениот концерт на Бреговиќ.
Додава дека познат новинар Албанец од Косово, кој е меѓународно почитуван и придонесува за престижните трибини на светскиот печат, отворено рекол дека Горан Бреговиќ нема никаква врска со ниту една од црнините кои му ги препишуват потпалувачите на омраза, како во Приштина така и во Тирана,
„Но, познатиот музичар од Сараево, со татко Хрват, мајка Србинка и жена Босанка – муслиманка, се претвори во ‘српски криминалец’, кој требаше да изгори во пожарите на албанскиот август. Иако Бреговиќ не кажал никогаш ништо против Албанците, воопшто не пееше за масакрите на режимот на Милошевиќ и никаде не беше поддржувач на тој режим, ниту со зборови, ниту со дела, вистината не беше важна. Она што беше важно беше огнот на слепата политика, која создава непријатели, се храни со непријателства и живее за непријателство“,
напиша Рама во објавата на Фејсбук.