На состанокот учествуваше и украинскиот претседател Володимир Зеленски кој е во Брисел. Земјите од „Коалицијата на добронамерните“ ги подготвуваат следните чекори во мировните преговори за Украина, а состанокот се одржува еден ден пред заминувањето во Вашингтон
Европските лидери денеска попладне одржаа состанок преку видеоконференциска врска на кој разговараа за мировниот договор за Украина за кој се обидува да посредува американскиот претседател Доналд Трамп по средбата со неговиот руски колега Владимир Путин.
На состанокот учествуваше и украинскиот претседател Володимир Зеленски кој е во Брисел. Земјите од „Коалицијата на добронамерните“ ги подготвуваат следните чекори во мировните преговори за Украина, а состанокот се одржа еден ден пред заминувањето во Вашингтон.
Доколку разговорите во Белата куќа успеат и следи трилатерален состанок, тоа ќе вреди повеќе од примирје, смета германскиот канцелар Фридрих Мерц.
„Претседателот Трамп е во право кога вели дека се чини дека Русија е подготвена да преговара во врска со таканаречената контактна линија, а не вдолж административните граници. Ова е голема разлика бидејќи со тоа се бараат територии што сè уште не ги окупирале воено. САД не доведоа во прашање ниту една од петте точки што ги дискутиравме“,
рече германскиот канцелар Фридрих Мерц.
Виртуелната средба ја предводеа британскиот премиер Кир Стармер, францускиот претседател Емануел Макрон и германскиот канцелар Фридрих Мерц, но на неа учествуваа и други лидери на европски земји.
Пред одржувањето на состанокот, Зеленски во Брисел имаше средба со Фон дер Лајен по која одржаа заедничка прес-конференција. На неа, таа изјави дека не треба да има било какви ограничувања за украинската армија или за странската воена помош за Украина.
„Не треба да има ограничувања за украинските вооружени сили, без разлика дали станува збор за соработка со трети земји или за помош од трети земји. Како што честопати велев, Украина мора да стане железен бедем, непробоен за потенцијалните агресори“,
рече таа.
Зеленски на утрешниот состанок во Белата куќа ќе биде придружуван од највлијателните европски лидери – Макрон, Мерц, британскиот премиер Кир Стармер, италијанската премиерка Џорџа Мелони, финскиот претседател Александар Стуб, како и од шефицата на Европската комисија, Урсула фон дер Лајен.
Во очи на утрешниот состанок, американскиот претседател Доналд Трамп се огласи на социјалната мрежа Трут Соушл и напиша – „Голем напредок во врска со Русија. Бидете во тек!“.