Денеска, лидерите на Европскиот совет усвоија изјава со која се утврдува заедничкиот став на Европската Унија (ЕУ) за ситуацијата на Блискиот Исток
ЕУ најостро го осудува Хамас и неговите, како што стои во соопштението, брутални и недискриминирачки терористички напади низ Израел, и длабоко жали за загубата на животи.
„Нема оправдување за теророт. Силно го нагласуваме правото на Израел да се брани во согласност со хуманитарното и меѓународното право пред ваквите насилни и недискриминирачки напади. Ја повторуваме важноста да се обезбеди заштита на сите цивили во секое време во согласност со Меѓународното хуманитарно право“,
се вели во соопштението објавено на веб-страницата на Европскиот совет.
Оттаму повикаа Хамас веднаш да ги ослободи сите заложници без никакви предуслови.
„Ја повторуваме важноста од обезбедувањето итна хуманитарна помош и сме подготвени да продолжиме да ги поддржуваме цивилите во Газа на кои им е најпотребна, во координација со партнерите, обезбедувајќи дека таквата помош нема да биде злоупотребена од терористичките организации. Клучно е да се спречи регионална ескалација“,
стои во соопштението.
Оттаму велат дека остануваат посветени на траен и одржлив мир заснован на решение преку зајакнати напори во мировниот процес на Блискиот Исток.
„Ја нагласуваме потребата за широко ангажирање со легитимните палестински власти, како и со регионалните и меѓународните партнери кои би можеле да имаат позитивна улога во спречувањето понатамошна ескалација“,
се вели во соопштението.