Одлуката доаѓа по виртуелниот состанок на европските лидери кои дискутираа за војната во Украина
Следниот месец, Европската Унија ќе преземе нови мерки против воената економија на Русија и ќе донесе нов пакет санкции против официјална Москва, напиша на Х шефицата за надворешна политика на ЕУ, Каја Калас. Таа рече дека ваква одлука паднала по виртуелниот состанок на лидерите на европските земји на кој се разговарало за војната во Украна, само еден ден откако европските лидери, заедно со украинскиот претседател Володимир Зеленски одржаа средба со американскиот претседател Доналд Трамп во Вашингтон.
The unity among EU leaders in today’s virtual Summit was palpable.
— Kaja Kallas (@kajakallas) August 19, 2025
Everyone is committed to a lasting peace that protects both Ukraine’s and Europe’s vital security interests.
Калас кажа дека единството во Европа е очигледно и оти темите за безбедноста на Украина, но и санкциите против Русија, ќе бидат меѓу приоритетите и на разговорите закажани за следната недела, кога ќе дискутираат министрите за надворешни работи и одбрана на Европската Унија.
„На Путин не може да му се верува дека ќе одржи какво било ветување или обврска. Затоа безбедносните гаранции мора да бидат силни и сигурни за да ја одвратат Русија од реорганизирање и повторно напаѓање“,
напиша Калас.
Пред само еден месец, ЕУ го усвои 18. пакет санкции кон Русија, поврзани со нејзината инвазија врз Украина.