Покрај обвинувањата со кои се соочува во Брисел, европратеничката која беше и потпретседателка на ЕП, сега ја гонат и истражните органи во нејзината земја
Покрај случајот отворен во Брисел, и грчкото Обвинителство за финансиски криминал отвори прелиминарна истрага за корупција и перење пари против грчката европратеничка Ева Каили јавија грчки медиуми повикувајќи се на извори во правосудството.
„Финансискиот обвинител нареди отворање истрага за земање мито и перење пари“,
изјавил неименуваниот извор алудирајќи не поранешната потпретседателка на парламентот на ЕУ, која сега е притворена во Белгија под обвинение за мито.
Ева Каили (44) е една од четворицата осомничени за примање мито, во скандалот наводно поврзан со лобирање за Катар. Приведените се осомничени дека влијаеле на одлуките на Европскиот парламент во корист на домаќинот на Светското првенство Катар во замена за пари и подароци.
Меѓу нив е и партнерот на Каили. Тие беа приведени минатата недела во акција на белгиската полиција, која изврши серија претреси во домовите и канцелариите на политичари, лобисти и парламентарни асистенти, при што беа запленети околу 1,5 милиони евра во готовина.
Вчера белгиската полиција објави и фотографии од запленетите пари, а Каили во случајот се брани дека не знаела за овие средства во нејзиниот дом кој ги донел партнерот.