Дефектот во Слупчане ќе се санира за скоро време откако добивме гаранции од министерот за економија Крешник Бектеши и градоначалникот на Липково, Еркан Арифи, дека нашите екипи нема да бидат спречувани од жителите при извршувањето на своите работни задачи, велат од ЕВН
Министерот за економија Крешник Бектеши и градоначалникот на Липково, Еркан Арифи, им гарантирале на екипите на ЕВН дека жителите на Слупчане нема да ги спречуваат да работат на отстранување на дефектот на електричната мрежа и да започнат со поставување на нови мерни системи кои ќе овозможат точно мерење на електрична енергија.
„По добиените гаранции од страна на министерот за економија, кој заедно со градоначалникот на Липково се договорил со жителите да не ги спречуваат екипите на електродистрибуција да работат и да започнат со проектот за реконструкција на мрежа и поставување нови мерни системи кои ќе овозможат точно мерење на електрична енергија, дефектот во Слупчане ќе се санира за скоро време“,
се наведува во соопштението од ЕВН.
Министерот Бектеши, пак, во изјава за медиумите вели дека разговарал со градоначалникот на општина Липково, Еркан Арифи дека ситуацијата во Слупчане ќе биде решена и екипите на „Електродистрибуција“ ќе може непречено да работат на отстранување на дефектите и надградба на дистрибутивната мрежа.
„Разговарав со градоначалникот Арифи, кој заврши одлична работа, колку што имам информација, разговараше со сите населени места, ако треба да помогнеме како Министерство за економија ќе помогнеме, за да излеземе во пресрет на жителите не само во Слупчане туку и во другите населени место. Но, морам уште еднаш да кажам дека сите граѓани имаат обврска да плаќаат за потрошената електрична енергија“,
кажа Бектеши.
Денеска, жителите од липковско Оризаре, Ваксинце и Лојане останаа без струја.
Причината, како што информираше ЕВН во официјално соопштение, е поради голем дефект кој го предизвикале жители од соседно Слупчане, кои насилно влегле во енергетски објект во припадност на „Електродистрибуција“ обидувајќи се сами да го вратат напојувањето на струја во селото.
Наместо да ја вратат струјата, тие предизвикале уште поголем дефект кој ги оставил без доток на електрична енергија трите соседни села. Ваквите манипулации од страна на нестручни лица, велат од ЕВН, се крајно небезбедни и може да имаат трагичен крај со смртни последици.
Доцна синоќа, жители на липковското село Слупчане запалија гуми на влезот од селото блокирајќи го пристапот до него. Според информациите што синоќа ги објавија дел од медиумите, „ЕВН хоум“ ја исклучила електричната енергија и селото, а тоа е причина за блокадата на патот.