„ЕВН Македонија“ донираше 13 перфузори и инфузиони пумпи за одделот за интeнзивна нега во градската болница Универзитетска клиника по хируршки болести „Св. Наум Охридски“ од Скопје. Оваа медицинска опрема се користи за правилно и прецизно дозирање на лековите кај пациентите во интензивна нега. Од ЕВН соопштија дека за набавка на перфузорите оваа компанија одвои 10 000 евра.
„Особено сме благодарни на ЕВН што реализира една ваква донација токму во време на актуелната ситуација со коронавирусот кога нашата клиника покрај своите пациенти ги презема и сите пациенти кои треба хируршки да се третираат од другите центри каде што се лекуваат заразените од вирусот. Токму oвие перфузори се потребни за адекватно третирање на пациентите во единицата за интензивно лекување во нашата установа“,
изјави директорот на клиниката, д-р Љубен Арсенков.
ЕВН во соопштението истакнува дека во последните шест месеци поддржале повеќе проекти и иницијативи во здравствениот систем во земјава.
Освен донацијата во градската болница, донирани се и 200 000 евра на Министерството за здравство за справување со коронавирусот. Со донација од 10 000 евра е реализиран приклучокот за електрична енергија за новата мобилна болница, а со 60 000 евра се купени прочистувачи на воздух и респираторни машини за новороденчиња.