Западните функционери стравуваат дека јазот помеѓу очекувањата и реалните резултати на контраофанзивата ќе доведе до размена на обвинувања помеѓу Украина и западните сојузници, но и до своевиден раздор во НАТО-алијансата, пишува Си-Ен-Ен
Закочената офанзива и ќор-сокак би можеле да имаат огромни последици во Соединетите Американски Држави, пишува во обемната анализа американскиот медиум Си-Ен-Ен. Доколку Украина не направи значителен прогрес, тоа би можело да го отвори прашањето за поддршката на САД за Украина бидејќи Вашингтон ќе влезе во тешка изборна година.
„Американците се подготвени за потенцијален судир помеѓу претседателот Џо Бајден кој ја оживеа НАТО-алијансата и е најголемиот поддржувач на Украина и поранешниот претседател Доналд Трамп, кој е НАТО-скептик и фан на Путин кој изјавуваше дека ќе стави крај на војната за 24 часа по теркот на условите на Путин. Дури и Трамп да не биде кандидат на републиканската партија, намалувањето на јавната поддршка за помошта на Украина може да му наштети на Бајден“,
пишува Си-Ен-Ен.
Висок дипломат за Си-Ен-Ен истакнал дека доколку растечкиот јаз помеѓу очекувањата за контраофанзивата, но и за реалните резултати на терен кои се далеку од очекувањата ќе доведе до размена на обвинувања меѓу Киев и западниот свет.
„Проблемот, се разбира, е дека тогаш Украинците ќе ја фрлат вината [за своите неуспеси] врз нас“,
изјавил висок западен дипломат за Си-Ен-Ен.
За да го покаже расколот во американското јавно мислење, телевизијата ја наведе анкетата на CNN спроведена минатата недела, според која 55 отсто од Американците сега веруваат дека Конгресот не треба да одобри дополнително финансирање поддршка на Украина. Околу 51 отсто велат дека САД веќе направиле доволно за да помогнат, а 48 отсто велат дека треба да направат повеќе. Набргу по руската инвазија во февруари 2022 година, 62 отсто рекоа дека САД треба да направат повеќе за да ја поддржат Украина.
„Белата куќа ја минимизира идејата дека Украина го губи моментумот и дека засега има многу време“,
пишува Си-Ен-Ен.
Долгонајавуваната украинска контраофанзива за ослободување на територии кои Русија ги освои од почетокот на војната, започна на почетокот на јуни годинава. Оттогаш до денеска е ослободен само мал дел од териториите, а украинските сили јавуваат дека се соочуваат со потешкотии поради бројот на мини кои непријателот ги поставил на военото поле.