Со средствата предвидено е да се изврши реновирање на шест хидроцентрали, изградба на ветерен парк во Богданци, како и изградба на регионални центри за цврст отпад во Полог, Пелагонија, Вардар, Југозападниот и Југоисточниот Регион, во соработка со Европската банка за обнова и развој
Северна Македонија ќе добие од Европската комисија 53.015.968 евра кои се за реализација на три нови проекти. Ова попладнево на својот фејсбук-профил го објави вицепремиерот за европски прашања Бојан Маричиќ.
Средствата, како што пишува Маричиќ, се за три нови проекти за спроведување на Економскиот и инвестициски план за Западен Балкан. Во овој план предвидени се реновирање на шест хидроцентрали, изградба на ветерeн парк во Богданци, како и изградба на регионални центри за цврст отпад во Полог, Пелагонија, Вардар, Југозападниот и Југоисточниот Регион, во соработка со Европската банка за обнова и развој.
„Европските фондови и странската донаторска помош е од огромно значење за енергетската независност и за заштита на животната средина, две области кои носат сериозно подобрување на квалитетот на живот за македонските граѓани“,
вели Маричиќ на Фејсбук.
Како национален ИПА-координатор, тој потенцира дека ова е помош за државата да ги изведе реформите и побрзо и полесно да ги достигне европските стандарди, преку подобрување на животната средина и на инфраструктурата.