Сакаме фер трговски договор, но остануваме подготвени да ги браниме нашите интереси, порача Шефчович по најавата на Трамп за царини кон ЕУ
Европската унија работи со добра волја за да обезбеди трговски договор со САД базиран на почитување, а не на закани, порача европскиот комесар за трговија Марош Шефчович. Коментарот доаѓа по најавите на американскиот претседател Доналд Трамп дека ќе воведе царини од 50 отсто за ЕУ.
„ЕУ е целосно ангажирана и решена да обезбеди договор што ќе им одговара на двете страни. Трговијата меѓу ЕУ и САД мора да биде водена од меѓусебно почитување, а не од закани. Ние сме подготвени да ги браниме нашите интереси,“
напиша Шефчович на платформата Икс.
Трамп ѝ се закани на Европската Унија со воведување царини од 50 проценти за увоз на стоки, почнувајќи од 1 јуни 2025 година.
Во објава на својата платформа Трут сошал, Трамп ја критикува ЕУ тврдејќи дека е „формирана со примарна цел да ги искористи Соединетите Американски Држави во трговската помош“ и дека е „многу тешка за соработка“. Тој потенцира и дека разговорите со нив „не водат никаде“.
Според него, овие практики довеле до трговски дефицит со САД од над 250 милијарди долари годишно, што тој го смета за „целосно неприфатливо“. Како одговор на ова, Трамп препорача воведување „рамна царина од 50 отсто за Европската Унија“, со исклучок на производите произведени или склопени во САД.