Во реакцијата на американскиот државен секретар Ентони Блинкен објавена на социјалната мрежа Икс се вели дека Соединетите Американски Држави остро го осудуваат терористичкиот напад во Москва и се солидаризираат со рускиот народ во тагувањето
Европската Унија (ЕУ), Соединетите Американски Држави (САД), НАТО, како и лидери на повеќе европски земји го осудија вчерашниот терористичкиот напад во концертната сала „Крокус сити хол“ во северозападна Москва, а во кој, според последните информации, загинаа 143 лица.
Меѓународната заедница мора да остане цврсто обединета против злото на тероризмот – порача во објава на социјалната мрежа Икс високиот претставник на Европската Унија (ЕУ) за надворешна политика, Жозеп Борел.
„Најостро го осудувам грозоморниот напад извршен во Москва. Тероризмот повторно таргетираше беспомошни луѓе. Меѓународната заедница мора да остане цврсто обединета против злото на тероризмот“,
пишува Борел во објавата на социјалната мрежа Икс.
I condemn in the strongest terms the heinous attack perpetrated outside Moscow last night.
— Josep Borrell Fontelles (@JosepBorrellF) March 23, 2024
Terrorism has targeted again defenceless people.
The international community must remain firmly united against the scourge of terrorism.
Осуда за синоќешниот напад во Москва стигна и од шефицата на Европската комисија, Урсула фон дер Лајен.
„Силно го осудувам терористичкиот напад врз цивили во ‘Крокус сити хол’ во Москва за кој одговорноста ја презеде ‘Исламската држава’. Моите мисли се со жртвите и нивните семејства во овој трагичен период“,
пишува Фон дер Лајен во објава на Икс.
I strongly condemn the terrorist attack against civilians in the Crocus City Hall in Moscow claimed by the Islamic State.
— Ursula von der Leyen (@vonderleyen) March 23, 2024
My thoughts are with the victims and their families during this tragic time.
Солидарност со рускиот народ по вчерашниот напад во Москва изразија и Соединетите Американски Држави.
Во реакцијата на американскиот државен секретар Ентони Блинкен објавена на социјалната мрежа Икс се вели:
„Соединетите Американски Држави остро го осудуваат терористичкиот напад во Москва на 22 март. Се солидаризираме со народот на Русија во тагувањето за загубата на животи по овој ужасен настан.“
The United States strongly condemns the March 22 terrorist attack in Moscow. We stand in solidarity with the people of Russia in grieving the loss of life after this horrific event.
— Secretary Antony Blinken (@SecBlinken) March 23, 2024
За вчерашниот терористички напад во Москва осуда упати и портпаролката на НАТО, Фарах Дерала, посочувајќи оти ништо не може да ги оправда ваквите злосторства.
„Недвосмислено ги осудуваме нападите насочени кон концертот во Москва. Ништо не може да ги оправда ваквите грозоморни злосторства. Нашето најдлабоко сочувство до жртвите и нивните семејства“,
стои во објавата на портпаролката на НАТО, Фарах Дерала.
We unequivocally condemn the attacks targeting concertgoers in Moscow. Nothing can justify such heinous crimes. Our deepest condolences to the victims and their families.
— Farah Dakhlallah (@NATOpress) March 23, 2024
Меѓу останатите светски лидери кои упатија осуда за терористичкиот напад во Москва, тоа го сторија и францускиот претседател Емануел Макрон и германскиот канцелар Олаф Шолц.
„Франција најостро го осудува терористичкиот напад во Москва за кој одговорноста ја презеде Исламската држава. Солидарност со семејствата на жртвите, повредените и рускиот народ“,
наведува Макрон во реакцијата.
La France condamne avec fermeté l’attaque terroriste revendiquée par l’État islamique à Moscou. Solidarité avec les familles des victimes, les blessés et le peuple russe.
— Emmanuel Macron (@EmmanuelMacron) March 23, 2024
Германскиот канцелар Олаф Шолц, пак, во објава на социјалните мрежи порача дека Германија го осудува „страшниот терористички напад врз невините посетители на концертот во Москва, а оти нивните мисли се со семејствата на жртвите и сите повредени“.
Wir verurteilen den schrecklichen Terrorangriff auf unschuldige Konzertbesucher in Moskau. Unsere Gedanken sind mit den Angehörigen der Opfer und allen Verletzten.
— Bundeskanzler Olaf Scholz (@Bundeskanzler) March 23, 2024
Според последните информации, во вчерашниот терористичкиот напад на концертната салата „Крокус сити хол“ во Москва загинале 143 лица, но се стравува дека бројката ќе се зголемува. Поради терористичкиот напад утре во Русија ќе биде прогласен ден на жалост.