Француското претседателство со Европскиот совет, сепак, нагласува дека регулативата може да биде отповикана пред тој рок доколку здравствената состојба го дозволи тоа
Европскиот парламент и европските влади се согласија вчера вечер дека правилата за сертификатите за коронавирус ќе останат во сила во следните 12 месеци бидејќи пандемијата на коронавирус сè уште трае.
Претставниците на Европскиот парламент и владите на ЕУ се согласија да ја продолжат регулативата до 30 јуни 2023 година, соопшти француското претседателство со Европскиот совет додавајќи дека регулативата може да биде отповикана пред тој рок, доколку здравствената состојба дозволи.
Сертификатите, како што се наведува, се наменети да го олеснат слободното движење на луѓето за време на пандемија, односно со помош на кју-ар код, сертификатот се докажува дали некое лице било вакцинирано против коронавирус, дали е негативно на тест за коронавирус или прележало ковид-19.
Во февруари Европската комисија предложи продолжување на важноста на регулативата за сертификати за ковид.
„Вирусот што предизвикува ковид-19 е сè уште распространет во Европа и во оваа фаза не е можно да се утврди влијанието на можното ширење на инфекцијата во втората половина на 2022 година или појавата на нови варијанти“,
соопшти Комисијата.
Проширувањето на регулативата им овозможува на патниците да продолжат да го користат својот сертификат доколку земјите-членки одржуваат одредени мерки за јавно здравје.