Претходно денеска, министерот за надворешни работи на Полска, Радослав Сикорски, изјави дека Емануел Макрон ги поканил лидерите на Европа во понеделник во Париз да разговараат за Украина
Европа ќе биде исклучена од мировните разговори помеѓу САД, Русија и Украина, изјави специјалниот претставник на Доналд Трамп за Украина, Кит Келог.
„Доаѓам од школата на реализмот и тоа нема да се случи. Можеби звучи непријатно, но ви кажувам искрено. А, на моите европски пријатели би им рекол, вклучете се во расправата без да се жалите дали ќе бидете на преговарачката маса или не, нудете конкретни предлози и идеи и зголемувајте го трошењето на одбраната“,
изјави Келог.
Претходно денеска, министерот за надворешни работи на Полска, Радослав Сикорски, изјави дека Емануел Макрон ги поканил лидерите на Европа во понеделник во Париз да разговараат за ситуацијата.
Келог кажа дека една од причините зошто пропаднале претходните мировни разговори Русија-Украина е што биле вклучени премногу држави кои не биле способни да го спроведат тој процес.
„Нема да ја повториме таа грешка“,
кажа Келог на во рамкитe на Минхенската безбедносна конференција.
Претходно, говорот на американскиот потпретседател Џеј-Ди Венс во Минхен ги алармираше европските лидери кои се сѐ позагрижени за пристапот на Трамп кон мировните преговори за Украина и стравуваат дека може да се постигне договор кој ќе биде поволен за САД, но ќе има долгорочни импликации за безбедноста на Украина и Европа.