Вчера властите на Косово спроведоа полициска операција против српските финансиски институции на северот, што резултира со затворање на шест објекти на „Поштенската штедилница“ и Народната банка на Србија во четири општини на северот на Косово, каде што живеат мнозинство Срби
Европската Унија (ЕУ) и американскиот Стејт департмент денеска изразија загриженост и разочарување од вчерашната полициска акција на косовските власти во која беа затворени филијалата на српската „Поштенска штедилница“ и уште пет нејзини објекти на северот на Косово.
„Затворањето и конфискацијата на канцелариите без претходна најава или координација и само неколку дена по последниот состанок на Дијалогот, на кој беше опфатено и прашањето за просториите на ‘Поштенска штедилница’, е ескалирачко, спротивно на духот на нормализација и ја поткопува добрата волја на Косово во постигнување нормализација на односите преку Дијалогот“,
се наведува во писмената реакција на портпаролот на Европската комисија за надворешни работи и безбедносна политика, Петер Стано.
Операцијата на косовската полиција, посочува Стано, ги загрозува тековните преговори за привремено решение за луѓето кои се негативно погодени од регулативата на Централната банка на Косово за готовински трансакции.
„Операцијата од понеделник уште еднаш докажува дека косовските власти имаат приоритет на еднострани и некоординирани акции, наместо соработка со нивните пријатели и сојузници“,
вели портпаролот на ЕУ.
Од американскиот Стејт департмент денеска изразија разочараност затоа што косовската полиција презела мерки во финансиските канцеларии на северот на Косово.
Во одговор за Радио Слободна Европа, од Стејт департментот додаваат дека акцијата не е координирана со меѓународните партнери и дека води кон ескалација на тензиите.
„Ја повикуваме Владата на Косово да се врати на конструктивен ангажман во дијалогот со посредство на Европската унија како соодветен канал за решавање на прашањата поврзани со нормализацијата на односите меѓу Косово и Србија и да одговори на основните потреби на сите нејзини граѓани, вклучувајќи ги и оние на српското малцинство, негативно погодени од неодамнешните промени во регулативата за валутата“,
велат од американскиот Стејт департмент.
Вчера властите на Косово спроведоа полициска операција против српските финансиски институции на северот, што резултира со затворање на шест објекти на „Поштенската штедилница“ и Народната банка на Србија во четири општини на северот на Косово каде што живеат мнозинство Срби.
Акцијата предизвика жестоки реакции од официјален Белград. Српскиот премиер Милош Вучевиќ изјави дека акцијата на косовската полиција против деловните субјекти на северот на Косово е „чин на варварство што директно го загрозува опстанокот на српскиот народ“ на Косово.
Министерот за внатрешни работи на Србија, Ивица Дачиќ, по тој повод изјави дека со упадот на полицијата во филијалите на „Поштенска штедилница“ косовскиот премиер Албин Курти „продолжува со теророт врз српскиот народ на Косово“.
Ова, како што додаде Дачиќ, „води кон нови конфликти на Балканот со непроценливи последици“.
Акцијата на косовските власти уследи една недела откако Централната банка на Косово објави дека завршил преодниот период на нејзината регулатива со која се забранува користењето на српскиот динар како средство за плаќање.