Претседателката на Европската комисија, Урсула фон дер Лајен, изјави дека Унијата сака да им даде шанса на преговорите
Европската Унија објави дека ќе го паузира воведувањето контрамерки против САД во траење од 90 дена.
Претседателката на Европската комисија, Урсула фон дер Лајен, изјави дека Унијата сака да им даде шанса на преговорите.
„Иако го финализиравме усвојувањето на контрамерките на ЕУ кои беа силно поддржани од земјите членки, решивме да ги одложиме за 90 дена. Доколку преговорите не бидат задоволителни, нашите контрамерки ќе стапат во сила. Подготовките за дополнителни контрамерки сè уште се во тек“,
рече Фон дер Лајен.
Таа ја поздрави одлуката на американскиот претседател Доналд Трамп за суспендирање на царините во траење од 90 дена, нагласувајќи дека ЕУ останува посветена на конструктивни преговори со САД, со цел постигнување непречена и заемно корисна трговија.
„Ја поздравувам најавата на претседателот Трамп за паузирање на царините. Ова е важен чекор кон стабилизирање на глобалната економија“,
рече фон дер Лајен во соопштението објавено од Комисијата.
Неколку часа подоцна, таа објави дека ЕУ ги паузира и царините за САД.
Да потсетиме дека на „Денот на ослободувањето“, Трамп воведе царина од 20 проценти на увозот од Европската Унија. Како одговор, ЕУ подготви контрацарини од 25 проценти за широк спектар на американски производи, вклучувајќи: бадеми, сок од портокал, живина, соја, челик и алуминиум, тутун и луксузни јахти. Вчера, Трамп ги суспендира тие царини за 90 дена.