Ваков предлог, како што вели пратеникот на Беса Кастриот Реџепи, беше поднесен и во минатиот собраниски состав, по договорот за коалицирање со СДСМ, ама не дојде до гласање поради распуштањето на парламентот
Етничката припадност на граѓаните во иднина ќе биде запишана и во нивните лични карти, доколку Собранието ги донесе измените на Законот за лична карта, што пред неколку дена ги поднесоа четворицата пратеници на владејачката Беса.
Предлог-измените се поднесени во скратена постапка, со оглед на тоа што со нив се интервенира во само неколку члена. Од Беса очекуваат поддршка и од другите пратеници од владејачкото мнозинство за донесување на законот, за кој, како што велат, била постигната согласност при потпишувањето на договорот за коалицирање со СДСМ, пред годинашниве парламентарни избори.
Договор на претходната Влада со Беса за тоа во личната карата да стои етничката припадност имаше и пред донесувањето на уставните амандмани што произлегоа од Преспанскиот договор. Тогаш Беса, како опозициска партија, учествуваше во обезбедување на потребното двотретинско мнозинство за донесување на уставните амандмани.
Вакви измени на Законот за лична карта, како што вели пратеникот на Беса Кастриот Реџепи, беа предложени и во минатиот собраниски состав, ама не дојдоа до гласање поради распуштањето на парламентот.
„Претходната влада, исто така, тогаш поднесе и други измени на Законот за лична карта, со цел оваа материја да се усогласи со уставните амандмани што произлегоа од Преспанскиот договор и со Законот за прекршоци, во делот на намалување на казните. И тие решенија сега се дел од измените што ги предлагаме“,
вели Реџепи за „360 степени“.
Беса во измените на Законот за лична карта со првиот член предлага во податоците на образецот за лична карта да се додаде и „етничката припадност“ на сите етнички заедници предвидени со Уставот на Северна Македонија.
Со предложените членови 2, 3 и 4 се врши усогласување со Законот за прекршоците од 2019 година, во насока на усогласување на прекршочните одредби. Со членот 5 се предвидува обврска на министерот за внатрешни работи да го усогласи Правилникот за образецот на барањето за издавање личната карта, образецот на потврдата за поднесено барање за издавање личната карта, образецот на личната карта, постапката за издавање и замена на личната карта и за начинот на водење на евиденција за издадените лични карти со одредбите од овој закон.
Со членот 6 од предложениот закон се врши интервенција во однос на името на државата, а со цел имплементација на уставните амандмани XXXIII – XXXVI и Уставниот закон за спроведување на уставните амандмани од минатата година.
Според сегашното законско решение, во личната карта се запишуваат следниве податоци: презиме и име на граѓанинот; државјанство; пол; датум на раѓање; матичен број; датум на издавање на личната карта; датум на важење на личната карта; место на раѓање ; живеалиште и адреса на граѓанинот; надлежен орган кој ја издал личната карта; број на личната карта и потпис на имателот на личната карта.
Образецот на личната карта се печати на македонски јазик и неговото кирилско писмо и на англиски јазик и неговото писмо. Податоците во образецот на личната карта се запишуваат на македонски јазик и неговото кирилско писмо и на основно латинско писмо. На граѓаните кои зборуваат службен јазик различен од македонскиот јазик, образецот на личната карта се печати и податоците во него се запишуваат и на службениот јазик и писмото што го употребува граѓанинот. На граѓаните кои зборуваат јазик различен од службениот јазик, на нивно лично барање, податоците за личното име што се внесуваат во личната карта се запишуваат на македонски јазик и неговото кирилско писмо и на јазикот и писмото што го употребува граѓанинот.