Агенцијата соопшти дека емисиите на руски јазик биле во спротивност со забраната за поттикнување извршување кривично дело и ја нарушувале јавната безбедност
Естонската Агенција за заштита на потрошувачите и технички регулативи (TTJA) денеска, на една година, го забрани емитувањето на руските канали РТР Планета, НТВ Мир, Росија 24 и ТВ Центар Интернационал. Слична забрана беше воведена и за телевизијата Белорусија 24.
Агенцијата својата одлука ја темели на говорот на рускиот претседател Владимир Путин во кој рускиот лидер ја оправда инвазијата на Украина. Агенцијата соопшти дека емисиите на руски јазик биле во спротивност со забраната за поттикнување извршување кривично дело и ја нарушувале јавната безбедност.
„Вонредните времиња бараат одлучни акции. Ние веруваме дека одредени телевизии во естонскиот информативен простор го преминаа прагот на толеранцијата“,
рече претседателот на ТТЈА, Каур Кајак.
И Летонија воведе забрана за телевизиски преноси на руски јазик.
Во двете балтички држави живеат значителен број припадници на руското малцинство.