Компанијата за производство на струја во моментов има 53 милиони евра долг кон добавувачи, а по основа на кредити кај комерцијалните банки фирмата е задолжена 140 милиони евра
АД „Електрани на Северна Македонија во државна сопственост“ (ЕСМ) ја заврши 2025 г. со загуба од 108 милиони евра, иако плановите беа годината да се заокружи на позитивна нула.
Претседателот на Управниот одбор и генерален директор, Лазо Узунчев, во интервју за „360 степени“ на МРТ 1 во објаснувањето вели дека лани не е произведена електрична енергија согласно планираното.
„Имајте предвид дека нашите приходи не доаѓаат сто проценти само од продажбата на електричната енергија кон универзалниот снабдувач. Логиката вели дека ако целокупните приходи доаѓаат оттаму во континуитет, не постои шанса ние секоја фискална година да ја завршуваме или да очекуваме да биде завршена на некоја позитивна нула или, дај Боже, на профитната страна. Во 2025 година планот беше да ја завршиме на позитивна нула затоа што количините на електрична енергија коишто планиравме да ги произведеме ќе ни овозможеа доволно достапни количини за покривање на конзумот кон универзалниот снабдувач, но и вишоци коишто ќе ни овозможеа дополнителни приходи. За жал, не произведовме доволно количество електрична енергија согласно планираното“,
вели Узунчев.
Тој додава дека во последните 5-6 години, компанијата не функционира во нормални околности – почнувајќи од ковид-кризата, преку случувањата во Украина, до актуелната криза на Блискиот Исток.
Трошоците за 2015 година изнесувале 470 милиони евра.
„360 степени“: Сепак, тоа не е значително помалку од 516 милиони колку што биле во 2024 година.
Лазо Узунчев: Да, затоа што директно е поврзано со ремонтот и ремонтните активности на сите блокови. Значи, трите во Битола и оној во Кичево.
Од друга страна, компанијата во моментов има 53 милиони евра долг кон добавувачите, а врз основа на кредити кај комерцијалните банки фирмата е задолжена со 140 милиони евра, што значи долг од околу 200 милиони евра.
Узунчев вели дека имаат грејс период од две години, што значи дека првата рата од првиот кредит ќе стигне за наплата во ноември годинава.
„360 степени“: Ќе успеваат ли ‘Електрани’ сами да ги враќаат ратите? Со оглед на тоа што сте акционерско друштво во државна сопственост, вие практично се позајмивте со државна гаранција, така? Во случај да не успеете да ги враќате кредитите, повторно државата, односно државниот буџет ќе мора да го сервисира тоа во ваше име.
Лазо Узунчев: Без тешкотии ќе може да си ги сервисираме нашите обврски кон деловните банки веќе од втората половина на 2027 година, кога ќе ни бидат оперативни новите производствени капацитети коишто ни се во фаза на реализација.
„360 степени“: А дотогаш?
Лазо Узунчев: Дотогаш ќе ги сервисираме или репрограмираме оние обврски коишто ќе ни претставуваат тешкотија да ги покриеме.