Од компанијата најавуваат дека согласно планот за производство на АД ЕСМ и Подружница РЕК „Битола“, во текот на следната недела ќе биде исклучен Блок 2
Од вчера попладне Блок 1 на РЕК „Битола“ повторно е ставен во функција, информираат од ЕСМ. Оттаму додаваат дека постројката е синхронизирана со македонскиот електроенергетски систем во 17:43 часот и испорачува електрична енергија.
„Блокот беше плански исклучен од мрежа заради повеќе интервенции на различни позиции со цел зголемување на стабилноста на постројката. Минатата година, за разлика од претходно, не се извршија класични ремонти на блоковите во летниот период кои предвидуваат запирање на производството од најмалку еден месец заради актуелната енергетска криза во која се наоѓа државата“,
велат од ЕСМ.
Наместо тоа, додаваат оттаму, се интервенирало на позиции, утврдени од стручни лица во комбинатот, кога ќе имало можност за тоа или кога било неопходно заради зачувување на стабилноста на постројките.
Од компанијата најавуваат дека согласно планот за производство на АД ЕСМ и Подружница РЕК „Битола“, во текот на следната недела ќе биде исклучен Блок 2 на РЕК „Битола“.
„На Блок 2 ќе се реализираат активности за нега и санација на постројката што е планирано да траат десетина дена“,
посочуваат од ЕСМ.