Ердоган, исто така, ги повика муслиманските земји да ги зголемат своите напори за воведување казнени мерки врз Израел врз основа на меѓународното право и резолуциите на ОН
Турскиот претседател Реџеп Таип Ердоган денеска изјави дека израелските напади врз Иран, непосредно пред новата рунда нуклеарни преговори со САД, имале за цел да ги саботираат преговорите. Според Ердоган, ова покажува дека Израел не сака да го реши проблемот преку дипломатија.
На состанокот на министрите за надворешни работи на Организацијата за исламска соработка во Истанбул, Ердоган ги повика земјите што имаат влијание врз Израел да не ја слушаат неговата „отровна реторика“ и да бараат решение преку дијалог, како и да не дозволат конфликтот да се шири.
Ердоган, исто така, ги повика муслиманските земји да ги зголемат своите напори за воведување казнени мерки врз Израел врз основа на меѓународното право и резолуциите на ОН.
Ердоган додаде дека израелската влада предводена од Бенјамин Нетанјаху е најголемата пречка за мир на Блискиот Исток.
Турскиот министер за надворешни работи Хакан Фидан, денеска, на своите муслимански колеги им рече дека Израел го турка регионот кон целосна катастрофа со своите напади врз Иран.
Фидан додаде дека светските сили мора да спречат ескалација на конфликтот.
На состанокот, Фидан ги повика муслиманските земји да го поддржат Иран против Израел и рече дека регионот има израелски проблем по офанзивата во Газа и нападите во Либан, Сирија, Јемен и Иран.