Најмногубројната пратеничка група во ЕП очекува на Самитот на ЕУ да се потврди почетокот на пристапните преговори со Северна Македонија и Албанија
Групата на Европската народна партија (ЕПП) во Европскиот парламентот, пред почетокот на денешниот Самит ЕУ – Западен Балкан, повика на поддршка и зајакнување на европската перспектива на земјите од овој регион
ЕПП, која е најмногубројна пратеничка група во Европарламентот, очекува на Самитот да се потврди почетокот на пристапните преговори со Северна Македонија и Албанија.
„Сега е време за единство. Почетокот на пристапните преговори е всушност одбрана на нашиот начин на живот и на нашето влијание во светот. ЕУ мора да биде доверлив и транспарентен партнер“,
порачуваат од групата на европските конзервативци и демохристијани.
Унгарската европратеничка од редовите на ЕПП, Кинга Гал, смета дека во овие времиња полни со предизвици важно ЕУ е да биде со Западниот Балкан. Солидарноста е клучна, порача Гал.
ЕПП укажува и на геополитичките последици од пандемијата со ковид-19 и предупредува дека не смее да се дозволи Западниот Балкан да „западне во стапицата на руските дезинформации“.
Портпаролот на ЕПП задолжен за надворешна политика, Михаел Галер, потенцира дека регионот на Западниот Балкан има подобра иднина во ЕУ.
„Ние Европејците мора да ја претвориме корона-кризата во можност и заеднички да ги решаваме последиците од пандемијата“,
изјави Галер додавајќи дека најавениот пакет помош од ЕУ за справување со ковид-19 претставува „позитивен развој на настаните“.
