Владејачката ГЕРБ на Бојко Борисов е членка на Европската народна партија, каде се и ВМРО-ДПМНЕ и партијата на Ангела Меркел
Од ЕК сметаат дека првата меѓувладина конференција треба да биде свикана што е можно побргу и Советот треба да се согласи за преговарачките рамки
Европската народна партија (ЕПП) нема коментар за блокадата на владејачката партија во Бугарија, која е и членка на ова политичко семејство во ЕУ.
Откако сите најголеми политички партии во Европскиот парламент повикаа да се деблокира ситуацијата во Советот на ЕУ и Бугарија да го крене ветото за преговарачката рамка со Северна Македонија, МИА побара реакција и од Европската народна партија, единствена која досега молчи на оваа тема.
Во Европската народна партија, во која членуваат владејачката ГЕРБ на бугарскиот премиер Бојко Борисов, како и македонската ВМРО–ДПМНЕ, немаат коментар на прашањето кој е нивниот став за блокадата на преговорите со Северна Македонија.
Во Европската народна партија членува партијата на германската канцеларка Ангела Меркел, од каде доаѓа и претседателката на Европската комисија, Урусла фон дер Лајен.
На денешниот редовен брифинг на Европската комисија, на прашањето кој е ставот на оваа институција за блокадата во Советот на ЕУ, поради која не може да напредува ниту Албанија, а засега не е планирано ни усвојување на заклучоците за другите земји од Западен Балкан, портпаролката Ана Писонеро повтори дека Европската комисија останува посветена на ЕУ-перспективата за регионот и дека за ова прашање треба согласност на земјите членки на Унијата.
„Би сакале првата меѓувладина конференција да биде свикана што е можно побргу, знаеме каде се наоѓаме и Советот треба да се согласи за преговарачките рамки“,
рече Писонеро, пренесе МИА.
„Политико“ пред неколку дена во анализа напиша дека Европската народна партија (ЕПП) не била доволно остра кон бугарскиот премиер Бојко Борисов, во однос на ветото што го стави Бугарија врз почетокот на преговорите на С Македонија со ЕУ.