Според ЕМА, едниот од овие лекови може да го намали воспалението и да спречи сериозно оштетување на дишните патишта кај пациенти со ковид-19
Ксевуди (Xevudy) и Кинерет (Kineret) се препорачуваат за употреба, соопшти ЕМА. Комисијата на ЕУ допрва треба да даде конечно одобрение, но тоа се смета за формалност.
Ова ќе го зголеми бројот на лекови одобрени за употреба во ЕУ за лекување на пациенти со ковид-19 на вкупно пет.
Ксевуди од производителите Глаксо Смит Клајн (GlaxoSmithKline) и Вир Биотехнолоџи (Vir Biotechnology) може да спречи влошување на симптомите кај пациенти на возраст од 12 години и постари.
Лабораториските истражувања покажаа дека Ксевуди е ефикасен и против варијантата Омикрон. Експертите од ЕМА веќе дадоа позитивно мислење за лекот и тој е веќе пропишан за употреба во некои земји-членки на ЕУ.
Кинерет на шведскиот производител Орфан Биовитрум АБ (Orphan Biovitrum AB) е веќе одобрен во ЕУ како третман за други воспалителни состојби. Според ЕМА, лекот може да го намали воспалението и да спречи сериозно оштетување на дишните патишта кај пациенти со ковид-19.
Еврокомесарката за здравство Стела Киријакидес ги поздрави препораките на ЕМА.