Украинските воздухопловни сили објавија дека регистрирале движење на брзи ракети во воздушниот простор над регионот Чернигов, кои се движеле кон регионот Киев, а подоцна и кон главниот град
Руските сили го нападнаа Киев со балистички ракети, а денеска е издадено предупредување за воздушен напад во голем број области на украинскиот главен град.
„Експлозии во главниот град. Киев е нападнат со балистички ракети. Силите за воздушна одбрана реагираат. Ве молиме останете во засолништата!“,
изјави градоначалникот на Киев, Виталиј Кличко.
Шефот на Киевската воена администрација на украинските воздухопловни сили Тимур Ткаченко, исто така, објави дека е во тек непријателски напад со балистички ракети.
Украинските воздухопловни сили објавија дека регистрирале движење на брзи ракети во воздушниот простор над регионот Чернигов, кои се движеле кон регионот Киев, а подоцна и кон главниот град.
Украинскиот министер за надворешни работи Андриј Сибиха повикува на состанок на лидерите за решавање на најтешките прашања во мировните преговори и нагласи дека само американскиот претседател Доналд Трамп може да ја запре војната.
Сибиха рече дека Украина се надева дека ќе поттикне чекори кон завршување на четиригодишната војна и ќе го искористи напредокот во разговорите посредувани од САД пред да се вклучат други фактори, како што е кампањата за изборите за Конгресот на САД во ноември, објави Украинска правда.
„Само Трамп може да ја запре војната“,
рече Сибиха.
За потсетување, украинскиот претседател Володимир Зеленски претходно изјави дека САД предложиле војната на Русија против Украина да заврши пред летото бидејќи Американците подоцна ќе имаат поинаков приоритет – изборите за Конгресот. Тој, исто така, потврди дека територијалното прашање и прашањето за нуклеарната централа во Запорожје останале нерешени за време на разговорите во Абу Даби. Зеленски додаде дека американските претставници таму повторно предложиле воведување енергетско примирје.