Поранешниот амбасадор Махи Несими ја тужи државата за штета што му била нанесена со процесот на лустрација. По рочиштето во Граѓанскиот суд, Несими посочи дека со решение на Управниот суд тој е прогласен за невин и врз основа на тоа денеска поднел тужба за надомест за претрпената штета.
„Не сакам ништо да прејудицирам, како што не кажував ни во текот на 7-8 години на судењата во Управниот суд. Јас побарав една разумна отштета со оглед на тоа каква штета ми е нанесена не само мене туку и на целото семејство. Тогашниот режим произведе инквизитори, а сега е редно државата тоа дејствување на режимот и инквизиторите да го плати. Мислам дека мојата лустрација имаше политичка заднина, тоа е докажано и во суд“,
изјави Несими.
Несими во 2012 година од страна на Комисијата за верификација на факти беше прогласен за таен соработник на поранешните безбедносни служби, со што му беше ограничено правото за извршување јавни функции. По многубројните критики на законот дека се користи за пресметка со политички неистомисленици, како и забелешките во извештајот на Прибе, Законот за лустрација беше стопиран во 2015 година. Со процесот беа лустрирани повеќе од 300 лица, а дел од нив правдата ја побараа и во Судот во Стразбур.