Во првиот квартал од 2023 година ќе има ново зголемување на минималната плата
Домашната економија може соодветно да одговори на ново зголемување на минималната плата, вели премиерот Димитар Ковачевски одговарајќи на новинарско прашање дали во вакви услови на криза е издржливо покачување на минималецот на 20 000 денари.
Премиерот потсети дека според новата методологија, која беше донесена на почетокот на годинава, минималната плата ќе се зголеми во март 2023.
„Во првиот квартал од идната година ќе имаме зголемување на минималната плата, согласно методологијата што беше направена на самиот почеток на мандатот на оваа Влада. Новата методологија предвидува дека минималната плата се усогласува 50 проценти со зголемувањето на трошоците за живот и 50 отсто со растот на просечната плата што значи дека имаме елемент на зголемување на продуктивноста на трудот и сметам дека економијата може соодветно да одговори на ова зголемување на минималната плата“,
рече Ковачевски.
Тој посочи дека при претходното зголемување бил директно вклучен во преговорите со бизнисот и тогаш не постоел поголем проблем бидејќи најголем дел од платите во приватниот сектор се на повисоко ниво.
„И самите гледаме дека преку зголемувањето на просечната плата во државата, сега многу повеќе се цени трудот на работниците, од случајот што беше порано во време на минатата власт, кога минималната плата беше на ниво од 8 000 денари, а просечната плата беше далеку помала од оваа што ја имаме денеска“,
додаде премиерот.
Претходниот договор за покачување на минималната плата се постигна во февруари годинава, а важеше од март 2022 година и тој значеше зголемување за 2 800 денари, односно на 18 000 денари од претходните 15 200. Покрај усогласувањето со годишниот раст на просечната плата и на трошоците за живот, дел од новата методологија беше и дека минималната плата не може дека биде пониска од 57 отсто од просечната плата.