Европската комисија го повтори ставот дека разговорите со Северна Македонија и Албанија треба да започнат што е можно поскоро со оглед дека ги исполнија условите за отпочнување на пристапните преговори со ЕУ. Брисел се надева дека овој чекор може да се случи пред Самитот на ЕУ и Западен Балкан, во мај, во Загреб.
Портпаролот на еврокомесарот за проширување и соседска политика Оливер Вархеји, Ана Писонеро, вчера истакна дека Комисијата смета дека двете земји ги исполнуваат критериумите за отпочнување на разговорите, кои беа блокирани од неколку европски земји предводени од Франција.
„Комисијата останува на својата препорака да се отворат преговорите што е можно поскоро, бидејќи двете земји овие земји го направија она што беше побарано од нив и продолжија со реформите“,
рече Писонеро запрашана во врска со усвојувањето на законот за јавното обвинителство во Северна Македонија.
На прашањето, дали Франција ќе го подигне ветото за почеток на преговорите со двете земји, Писонеро одговори:
„Ние сме подготвени. Се надеваме дека тоа може да се случи пред самитот во Загреб, но не може да предвидиме како ќе се однесуваат земјите членки“.
На неформалниот состанок на ЕУ со лидерите од Западен Балкан во неделата, претседателката на ЕК Урсула фон дер Лајен истакна дека интерес на ЕУ е да ги донесе овие две земји што е можно поблиску до себе, оценувајќи го тоа како „приоритет на Комисијата“.
Таа изрази желба да се постави основа за почеток на преговорите „ако е можно“ пред Загребскиот самит, додека се чека на ревидираната методологија која треба да го направи процесот појасен.
Брисел ја претстави новата методологија на почетокот од февруари, со која им се дава поголема улога на 27-те земји членки да го вратат на почеток процесот на преговори ако државата кандидат не напредува во реформите за членство во Унијата. На овој начин Комисијата сака да ги вклучи земјите членки во процесот на пристапување преку годишни лидерски самити кои ќе вршат преглед на статусот на преговорите и ќе ангажираат експерти од членките во дадени полиња. На земјите кандидати, пак, новата методологија треба да им овозможи поголеми бенефиции во форма на инвестиции.
Поврзана вест 360° анализа: Новата методологија и времетраењето на преговорите за членство во ЕУ
Францускиот претседател Емануел Макрон неодамна изјави дека ако резултатите од извештаите на Европската комисија за Северна Македонија и Албанија се позитивни, тој ќе поддржи почеток на преговори со овие земји за влез во ЕУ.
Извештајот за напредокот на Северна Македонија и Албанија се очекува од 2 до 4 март, а идејата е Европската комисија да излезе со него кога сите земји-членки ќе бидат позитивни за давање зелено светло за датум за почеток на преговори со Унијата, објави МИА повикувајќи се на дипломатски извори од Брисел. Извештајот треба да биде усвоен на состанокот на еврокомесарите, кои имаат средба в среда на 4 март.