Во меѓувреме и австралискиот премиер Скот Морисон ја повика Кина да се приклучи кон глобалните напори за ставање крај на руската инвазија на Украина, бидејќи смета дека не постои земја што ќе има поголемо влијание од Кина врз крајот на војната во Источна Европа
Европската Унија не ја исклучува Кина за притисок врз Русија, изјави портпаролот за надворешна политика во Европската комисија, Петер Стано, а јави дописничката на МИА од Брисел.
Како што изјави денеска портпаролот Стано, високиот претставник за надворешна политика Жозеп Борел, е во контакт со кинеските власти со цел да се најде решение за руско-украинскиот конфликт.
Во контекст на војна помеѓу Русија и Украина, Европската унија полага надеж во добрите односи помеѓу Москва и Пекинг за да се изврши притисок врз руската влада да стави крај на инвазијата на Украина.
„Велиме дека Кина е клучна за притисок врз Русија да ја прекине агресијата и овој напад без преседан, Кина има потенцијал да комуницира со Москва и би сакале Кина да го искористи своето влијание за да притисне за прекин на огнот“,
изјави Стано на денешниот брифинг за новинари во Европската комисија.
За Европската Унија е важно што Кина не беше меѓу петте држави кои гласаа против резолуцијата во Обединетите нации за осуда на руската агресија врз Украина. Кина гласаше воздржано, што остава простор за надеж во ЕУ.
„Тоа покажува дека Кина не е меѓу изолираните земји кои беа против резолуцијата, и тоа е причина за нас да го зголемиме нашиот ангажман“,
рече портпаролот, додавајќи оти Борел останува во контакт со кинескиот министер за надворешни работи.
Кина одби рускиот напад врз Украина да го нарече инвазија, а неодамна порача дека нејзините односи со Русија се многу црврсти, додека, пак, кинескиот министер за надворешни работи Ванг Ји денеска во Пекинг изјави дека Кина ќе продолжи да ја продлабочува стратегиската соработка со Русија.
„Кина и Русија ќе го задржат својот стратегиски фокус и ќе продолжат да го продлабочуваат кинеско-руското сеопфатно стратегиско партнерство за нова ера“,
истакна Ванг на прес-конференција.
Тој, исто така, нагласи дека Кина сака да продолжи да игра конструктивна улога во поттикнувањето на руско-украинските преговори.
Во меѓувреме и австралискиот премиер Скот Морисон ја повика Кина да се приклучи на глобалните напори за ставање крај на руската инвазија на Украина, бидејќи смета дека не постои земја што ќе има поголемо влијание од Кина врз крајот на војната во Источна Европа.
„Кина долго време тврдеше дека една од најголемите светски сили треба да придонесе за глобалниот мир и стабилност. Нема земја која ќе има поголемо влијание од Кина врз завршувањето на оваа ужасна војна во Украина“,
истакна Морисон во говорот во Институтот Лови во Сиднеј.