Според Фон дер Лајен, бугарскиот план е исклучителен бидејќи речиси 60 отсто од него е за поддршка на зелената транзиција
Европската комисија го одобри бугарскиот план за закрепнување и одржливост, изјави претседателката на Комисијата Урсула фон дер Лајен денеска во Софија, на заедничката прес-конференција со премиерот Кирил Петков, на која беше претставен документот.
Според неа, бугарскиот план е исклучителен бидејќи речиси 60 отсто од него е за поддршка на зелената транзиција.
Фон дер Лајен рече дека за ЕК е важно Бугарија да биде со ЕУ во оваа насока. Според неа, планот исполнува многу услови. По позитивната оценка за бугарскиот план, Фон дер Лајен на премиерот Петков му врачи почесна плакета.
Тој соопшти дека планот претставува 10 отсто од бугарската економија бидејќи предвидува инвестиции наспроти реформите во различни сектори. Овој план е остварлив, иновативен и реално ќе обезбеди модернизација на Бугарија. Според Петков, тој ѝ овозможува на земјата да обезбеди енергетска безбедност и да ги користи најновите технологии, да го користи потенцијалот на геотермалните извори, на минерална вода за енергија, како и да се реформира судството и комисијата за конфискација на незаконски стекнат имот, како и да се модернизира бугарската железница и инвестиции во образованието, истражувањето и модернизацијата.
Планот вклучува 57 инвестиции и 47 реформи во 12 различни области кои треба да се спроведат до 2026 година. Бугарија ќе добие над 12 милијарди и 500 милиони лева (6.250 милијарди евра) од европско финансирање.
Претседателката на ЕК, Урсула фон дер Лајен, ѝ се заблагодари на бугарската влада за помошта на украинските граѓани кои бараат засолниште од војната.
Повеќе од 70 000 бегалци од Украина се во Бугарија по руската инвазија врз нивната земја.