Највисоките концентрации на ПМ 2,5 честички се измерени во Косово, Србија, Албанија, Бугарија и Северна Македонија, се вели во редовниот извештај за состојбата со аерозагадувањето во Европа
Европската комисија денеска го презентира својот редовен извештај за состојбата со аерозагадувањето во Европа, кој ги вклучува и шесте земји од Западниот Балкан, при што се оценува дека состојбата сѐ уште е незадоволителна, јави МИА од Брисел.
Здравјето на жителите на Северна Македонија и останатите земји од регионот и натаму е сериозно загрозено, покажуваат последните бројки на извештајот на Европската агенција за животна средина за 2018 година, што резултира во висока стапка на прерана смрт, пред сѐ поради високата концентрација на ПМ 2,5 честички во воздухот, се наведува во извештајот.
Ако највисоката стапка во апсолутни бројки е во Германија, Италија, Полска и Франција поради обемното население, во релативни бројки, ефектот е најнегативен на Балканот.
„Кога се гледаат изгубените животни години во релативна смисла, најсилно влијание има во Централна и Источна Европа каде што се измерени највисоките концентрации на ПМ 2,5 честички, односно Косово, Србија, Албанија, Бугарија и Северна Македонија“,
се нагласува извештајот.
Според европскиот комесар за животна средина Вириниус Синкевичиус, главната причина е греењето на домаќинствата.
За извршниот директор на Европската агенција за животна средина, Ханс Брејнинкс, еден од главните проблеми е употребата на цврсти горива – јаглен во индустријата, енергетскиот сектор и горењето на дрво во домаќинствата, како и старите возила кои се користат во регионот и кои повеќе загадуваат.