Истрагата за несреќата е почната, а ја води дежурниот обвинител во Обвинителството на кантонот Сараево. Од Обвинителството велат дека се ангажирани и механички и сообраќајни експерти
Една жена загина, а неколку други лица се повредени кога градски трамвај во Сараево излетал од шините на една од најпрометните улици во близина на Националниот музеј на Босна и Херцеговина и Амбасадата на САД.
„Едно лице загина. Според моменталните податоци, две лица се повредени. Обвинителот е информиран, а полицајците се на терен“,
соопшти Министерство за внатрешни работи.
Jedna djevojka je smrtno stradala nakon što je u Sarajevu tramvaj iskočio iz šina, saznaje @IstragaB pic.twitter.com/4XiO0zKiHS
— Istraga.ba (@IstragaB) February 12, 2026
Според достапните информации, трамвајот излетал од шините околу пладне и притоа ја пробил заштитната ограда и се лизнал десет метри на патот. Целиот преден дел од трамвајот бил уништен.
Во несреќата една жена била згмечена од трамвајот кога тој излетал од шините. За да стигнат до нејзиното тело, пожарникарите морале да ја пресечат оштетената структура на возилото.
Информациите што ги пренесуваат босанските медиуми се дека едно од повредените лица е девојче на возраст од 16 години на кого во Општата болница во Сараево денеска и била ампутирана ногата.
Истрагата за несреќата е почната, а ја води дежурниот обвинител во Обвинителството на кантонот Сараево. Од Обвинителството велат дека се ангажирани и механички и сообраќајни експерти.
Станува збор за еден од старите трамваи од чешко производство, кои сè помалку се користат бидејќи минатата година почнале да ги заменуваат со нови возила произведени од швајцарската компанија „Штадлер“.