Единаесет нови случаи на коронавирус се потврдени во Тиквешко во изминатите 24 часа, заболена е и една наставничка, пренесе државната агенција МИА повикувајќи се изјава од епидемиологот Ристе Јовановски од кавадаречкиот Центар за јавно здравје.
Девет од новозаболените лица се од Кавадарци, а по едно од Неготино и Демир Капија.
„Изолирани се една наставничка и 16 ученици, ќе биде извршена дезинфекција во училиштето. Едно 53 годишно лице од Демир Капија е хоспитализирано во Велес“,
изјавил Јовановски за МИА.
Сите новозаболени имале симптоми, а двајца од нив пријавиле дека претходно имале контакт со лице позитивно на ковид-19.
Од почеток на пандемијата досега, во Кавадарци заболеа 260 лица. Во Неготино 53, а во Росоман и Демир Капија по 13.