Запрашан да ја коментира одлуката на Комисијата, Хајрулахи обвинува за притисоци кои наводно биле вршени врз известителот Вјолца Елмази
Суспендираниот шеф на Вишото јавно обвинителство Скопје, Мустафа Хајрулахи, најави дека ќе поднесе жалба до Советот на јавни обвинители. Најавата од Хајрулахи доаѓа по денешната одлука на Комисијата за утврдување на дисциплинска одговорност, која утврди дека тој и уште еден јавен обвинител од Вишото јавно обвинителство Скопје сториле тешки дисциплински повреди, односно намерно и неоправдано направиле крупни професионални грешки.
Хајрулахи тврди дека единствената причина за целата хајка против него е постапката за бонусите за ангажираните во поранешното Специјално јавно обвинителство (СЈО).
„Најодговорно и под морална, материјална и кривична одговорност тврдам дека единствената причина за целата хајка против мене се само бонусите против СЈО“,
вели Хајрулахи во изјава за МИА.
Запрашан да ја коментира одлуката на Комисијата, Хајрулахи обвинува за притисоци кои наводно биле вршени врз известителот Вјолца Елмази.
„Па како можам да ја коментирам освен да и се јавите на известителот Вјолца Елмази да ја прашате колку недели не е спиена од притисоците на Љупчо Коцевски за да даде таков предлог“,
вели Хајрулахи.
Хајрулахи нагласи дека по одлуката на Комисијата, следува поднесување жалба до Советот на јавни обвинители. Советот треба да формира Комисија од тројца членови кои ќе бидат и известители по однос на предлогот. Дури потоа, Комисијата со двотретинско мнозинство ќе треба да одлучува по однос на доставениот предлог.
Од Јавното обвинителство на Република Македонија (ЈОРСМ) денеска информираа дека Комисијата за утврдување дисциплинска одговорност донела одлука дека Хајрулахи сторил тешки дисциплински повреди и оти ќе поднесе предлог за негово разрешување до Советот на јавни обвинители.
Освен за Хајрулахи, Комисијата донела одлука и за вишиот обвинител Јован Цветановски, на кој, како што соопштуваат од Јавното обвинителство на Република Северна Македонија (ЈОРСМ), одредена му е казна намалување на плата.