Од Основниот суд Штип велат дека пресудата не е правосилна и оти следува период на жалби до штипска Апелација
Единаесет месеци затвор доби 43-годишниот родител што физички нападна двајца малолетни фудбалери на натпреварот меѓу младинските екипи на фудбалските клубови Шкупи и Брегалница, што се одржа на 24 август на стадионот „Бело Брдо“ во Штип.
Сашко Георгиев, портпарол на Основниот суд Штип, вели дека пресудата не е правосилна и оти следува период на жалби до штипска Апелација.
„Кривичниот судски совет, чиј претседател е судијата Невена Перица, ја има донесено пресудата за обвинетиот Авни Абгулиј од Скопје за сторено кривично дело насилство од член 386 став 4 од Кривичниот законик. Тој е осуден на казна затвор од 11 месеци, а пресудата не е правосилна, следи периодот на жалби до Апелацискиот суд во Штип“,
вели Георгиев.
Инцидентот, за кој Основното јавно обвинителство во Штип покрена обвинителен предлог против родителот, се случи на 24 август. Во 89. минута од натпреварот, судијата поради прекршок доделил втор жолт картон, со што го исклучил од игра синот на осомничениот кој играл за клубот Шкупи.
Незадоволен од одлуката, најпрвин синот се однесувал неспортски и со тупаници и клоци се обидел да се пресмета со еден од фудбалерите на Брегалница. Тогаш на терен влегол таткото и со тупаници и клоци почнал да ги удира двете деца, нанесувајќи им телесни повреди – повеќе набиеници и скршеници на нос без дислокација. На игралиштето влегле и други лица од публиката, кои спречиле натамошна ескалација на настанот, наведоа од ОЈО во соопштението од 25 август.
На родителот му беше одреден осумдневен притвор, кој потоа беше продолжен за 30 дена.
Фудбалската федерација на Македонија (ФФМ) веднаш му изрече најстрога казна исклучување од фудбалска организација на играчот од Шкупи, а покрај него на уште двајца соиграчи што се вклучени во инцидентот им е изречена казна забрана за играње во траење од три месеци. Казна да не игра четири натпревари заработи и 15-годишен фудбалер на штипска Брегалница, кој се впуштил во груба игра и самозаштита при нападот.