Македонскиот државјанин, како што пренесува српски „Блиц“, со прострелна рана во грбот бил пронајден во улицата „Новопазраска“, недалеку од местото на пукањето
Српското МВР утрово соопшти дека го идентификувала и уапсила осомничениот напаѓач. Тој е идентификуван како Н.Ѓ. роден 2003 година и му е одреден притвор од 48 часа. Во соопштението на МВР на Србија е наведено дека едниот од ранетите е државјанин на Северна Македонија. Оттаму засега нема информации за мотивите за пукањето и за двајцата ранети. „360 степени“ испрати прашања до македонското МНР во врска со случајот, но до моментот на објавување на веста не добивме одговор
Еден од двајцата ранети во вооружениот инцидент, кој вчеравечер се случил во белградската населба Врачар, е 21-годишен македонски државјанин.
Дека станува збор за македонски државјанин утрово соопшти српското Министерството за внатрешни работи.
Тој и уште едно лице на 26-годишна возраст од Белград биле застрелани на аголот од улиците „Максим Горки“ и „Цар Николај“, кога маж пукал од огнено оружје, а потоа побегнал.
Македонскиот државјанин, како што пренесува српски „Блиц“, со прострелна рана во грбот бил пронајден на улицата „Новопазраска“, недалеку од местото на пукањето, додека дваесет и шестгодишниот белграѓанец со иницијали А.П., со повреда на десната натколеница, бил префрлен во Ургентниот центар.
По тричасовна потрага, белградската полиција успеала да го идентификува и да го уапси осомничениот напаѓач. Според официјалните информации од Министерството за внатрешни работи на Србија, станува збор за Н.Ѓ. роден 2003 година, кому по налог на белградското вишо јавно обвинителство му е одреден 48-часовен притвор.
„Припадниците на МВР во Белград во брза и ефикасна акција го уапсија Н. Ѓ. (2003). Се сомничи дека синоќа на улица ‘Максим Горки’ со истрели од огнено оружје на дваесет и шестгодишен белграѓанец и дваесет и едногодишен државјанин на Северна Македонија им нанел тешки телесни повреди, а потоа побегнал. Полицијата набрзо го идентификувала и го пронашла. По наредба на Вишото јавно обвинителство во Белград, на осомничениот му е одреден притвор до 48 часа, по што ќе биде изведен пред обвинител“,
се наведува во краткото соопштение објавено на официјалната интернет-страница на српското МВР.
Оттаму нема подетални информации за мотивите за пукањето, како и за двајцата ранети.
Во врска со ранетиот државјанин на С Македонија, засега нема информации од Министерството за надворешни работи на РСМ. Според дел од српските медиуми, македонскиот државјанин бил случајно ранет во престрелката.
„360 степени“ испрати прашања до МНР во врска со случајот, но до моментот на објавување на веста оттаму не добивме одговор.
Српски „Блиц“ пренесе сведоштво на жена која живее во зграда во близина на местото каде што се случило пукањето. Таа изјавила дека слушнала три истрели за кои првично мислела дека се петарди.
„Излегов на терасата и видов дека луѓето од другата страна на зградата се истрауматизирани. Кога слегов, таму лежеше рането момче. Подоцна слушнав дека напаѓачот побегнал и најверојатно ранил уште едно лице. Преплашени сме. Којзнае каде истрча“,
изјавила таа за „Блиц“.